Արդյոք այնպիսի մի պատերզմի մե՞ջ ես, որը վաղուց ավարտվել է հաղթանակով։

Հիրո Օնոդան ճապոնացի հետախույզ էր, ով 1944 թվականի դեկտեմբերին միացավ Վակայամայի 61-րդ հետևակային գնդին։ Նրանց առաքելությունը Ֆիլիպպիններում  էր, որն այն ժամանակ Միացյալ Նահանգների տարածքն էր, սակայն գրավվել էր Ճապոնիայի կողմից։ 1945 թվականին ամերիկյան զորքերը հետ գրավեց կղզին։ Սակայն, Օնոդայի համար պատերազմը դեռ շարունակվում էր։ Նա չէր հավատում, որ այն ավարտվել է։ Նա համարվում էր անհետ կորած և 1959 թվականին պաշտոնապես ճանաչվեց որպես մահացած։ Այդ տարիներին ճապոնացի մի ուսանող շուտով գտավ նրան, սակայն Օնոդան համառորեն մերժում էր պատերազմի ավարտված լինելու միտքը, քանի դեռ իր հրամանատարությունը չէր տվել նրան զենքը վայր դնելու հրամանը։ Օնոդայի նախկին հրամանատարներից մեկը ստիպված եղավ ճամփորդել Ֆիլիպինների Լյուբանգ կղզի և տեղեկացնել Երկրորդ Համաշխարհային պատերազմում Ճապոնիայի կրած պարտության մասին։ Այդ պատերազմի ավարտից միայն 29 տարի անց Օնոդան լքեց Ֆիլիպինների ջունգլիները… 

Սիրելի բարեկամ, մինչ այս պատմությունը կարող է անհավատալի թվալ քեզ, սակայն պետք է նշեմ, որ երբեմն հենց մենք ենք շարունակում պատերազմել այնտեղ, որտեղ պատերազմը վաղուց ավարտված է։ Նույնիսկ եթե մենք անկեղծորեն վստահում ենք Աստծուն մեր փրկության պարագայում, հնարավոր է, որ նույն համոզվածությամբ չենք վստահում Նրան մեր կյանքի մնացած բնագավառներում։ Աստծուն հաղթանակի հարցում չվստահելը հատկապես ակնառու է դառնում, երբ խոսքը վերաբերում է այնպիսի կարևոր ոլորտի, ինչպիսին օրինակ ֆինանսն է։ Իսկ եթե ավելի անկեղծ լինենք, ապա շատերս կարող ենք խնդիրների բախվել անգամ Աստծո Խոսքի այնպիսի հատվածների հանդեպ անսասան հավատք ունենալու հարցու, ինչպիսին այս ասվածն է. «Եվ իմ Աստվածը թող համաձայն Իր հարստության ձեր կարիքները հոգա Քրիստոս Հիսուսի փառքի միջոցով» (‭‭Փիլիպպեցիս‬ ‭4․19):

Այսօր քաջալերում եմ քեզ այսօր ամուր կառչել Աստծո Խոսքից։ Աստված մարդ չէ, որ ստի։ Հովհաննես  ‭8․36‬ խոսքում կարդում ենք․ «Արդ, եթե Որդին ձեզ ազատի, ճշմարտապես ազատ կլինեք»։

Խաչի վրա Քրիստոս մահացավ՝ Իր վրա վերցնելով իմ և քո կյանքի բոլոր անեծքները։ Սա նշանակում է, որ Նա մահացավ նաև քո ֆինանսական ազատության համար։ Եթե միայն հասկանանք, որ Նա վաղուց հաղթել է նաև այս պատերազմը․․․ Եթե միայն հասկանանք, որ այդ հաղթանակը նաև մեր հաղթանակն է, երբ մենք ապրում ենք ֆինանսական հավատարմության Աստծո Խոսքի սկզբունքներին համահունչ, ապա կդադարենք պատերազմել ու տառապել մեր կյանքի մի ոլորտի համար, արտեղ Որդին վաղուց մեզ ազատել է ամեն տեսակ անեծքներից և օրհնության հաղթանակներ հոգացել մեզ համար։

Ուզում եմ քեզ իմ կյանքից վկայել։ Մի քանի անգամ, երբ ֆինանսական ծանրագույն վիճակում եմ եղել․․․ այնպիսի վիճակում, որ ելք պարզապես չի երևացել, Աստված գերբնական կերպով հոգացել է, և ես կա՛մ մի նոր թարգմանության առաջարկ եմ ստացել (վերջին տարիներին իմ եկամտի մի մասը անգլերենից հայերեն թարգմանություններից է գոյացել), կա՛մ իմ ծանոթներից մեկը տարիներ առաջ վերցրած պարտքն է վերադարձրել, կա՛մ էլ Աստված մեկ այլ կերպով ֆինանսական օրհնություն է հոգացել ինձ համար։ Նա սիրում է Իր զավակների համար հոգ տանելը։

Աստծո համար թանկ ու կարևոր զավակ, անշուշտ, սա չի նշանակում, որ միշտ երբ կարիքի մեջ եմ եղել, Աստված գերբնական հրաշք է արել։ Կարծում եմ՝ երբեմն Տերը փորձում է Իր հանդեպ մեր հավատարմությունն ու երախտագիտությունը՝ անկախ մեր իրավիճակներից ու ճգնաժամերի ուժգնությունից։ Սակայն, այնուամենայնիվ, այսօր ուզում եմ քաջալերել քեզ, քանի որ Աստված երբե՛ք անտարբեր չի մնում մարդկանց կարիքի նկատմամբ։ Հավատում եմ, որ Նա կմիջամտի նաև քո իրավիճակին։ Հավատարիմ եղի՛ր Նրա սկզբունքներին։ Կառչի՛ր Նրա Խոսքից։ Հավատա՛ Նրա խոստումներին։ Եվ եթե ամեն բանից առաջ Նրա Արքայությունը և Նրա արդարությունը փնտրես քո կյանքում, ապա Աստված ԿՀՈԳԱ քո բոլոր կարիքները։

«Դուք նախ Աստծու արքայությունն ու նրա արդարությո՛ւնը փնտրեք, և այդ ամենը ավելիով ձեզ կտրվի» (Մատթեոս 6.33):

Շնորհակալ եմ, որ դու կա՛ս։