Մի՛ փախիր դժվարություններից

Սիրելի՛ բարեկամ, երբևէ նկատե՞լ ես, որ դժվարության հանդիպելիս մեր ինքնապաշտպանության առաջին արձագանքը հիասթափությունն է։ 

Դժվար է հասկանալ, թե ինչո՛ւ է ամուսինդ կամ կինդ անդադար հեռախոսին նայում, երբ դու խիստ կարիք ունես, որպեսզի նա քեզ ժամանակ հատկացնի։ Ինչո՛ւ են քո աշխատակիցներն ամեն բան անում, որպեսզի աշխատանքդ հնարավորինս բարդացնեն։ Եվ ինչո՞ւ հովիվը ժամանակ չունի կամ չի կարողանում քեզ օգնել, երբ խնդիրներդ, ավելի քան երբևէ, հրատապ լուծման կարիք ունեն․․․   

Եվ գործի է դրվում ինքնապաշտպանության մեր բնազդը։ Արդյունքում մենք փախչում ենք։

Մենք ջանք ենք անում կամ գոնե լրջորեն մտածում, որպեսզի նման իրավիճակներից հետո փոխենք մեր՝

• Եկեղեցին,
• Աշխատանքը,
• Բնակավայրը,
• Ընկերներին,
• Եթե ոչ փոխենք, ապա լրջագույնս նեղանանք մեր կողակցից,
• Եվ այլն․․․

Հետո, երբ անում ենք դա, ապա հիմնականում որոշակի ժամանակ անց այդ նույն դժվարությունները կրկնվում են արդեն նոր իրավիճակում․․․ Գուցե մենք ամեն բան անենք, որպեսզի մերժենք դրանց առկայության փաստը։ Եվ նախընտրենք չնկատել դրանք․․․

Սակայն դրանցից փախչելու փոխարեն Տերը, որքան էլ անտրամաբանական ու զարմանալի թվա, մեզ հորդորում է ուրախություն գտնել դժվարությունների մեջ և նույնիսկ վայելել դրանք հաղթահարելու բերկրանքը։ 

«Ուստի հանուն Քրիստոսի հաճույքով համբերում եմ տկարությունների, նախատինքների, վշտերի, հալածանքների և նեղությունների, որովհետև երբ տկարանում եմ, այն ժամանակ զորանում եմ (Բ Կորնթացիս 12․10)։ 

Ինչո՞ւ։ Պատճառն այն է, որ այդ դժվարությունները քեզ ուղերձ են փոխանցում։ 

Աստծու համար թանկ ու սիրելի՛ զավակ, ի՞նչ է ուզում փոխանցել քեզ Աստված։

Քո երկնային Հայրն ուզում է, որ քայլես Իր պարգևած հաղթանակների մեջ, քանի որ Նա արդեն իսկ ամեն բան հոգացել է քեզ համար։ Նրա շնորհը միայն արդեն իսկ բավական է․․․ Նրա շնորհիվ դու կարող ես քո սրտի դառնությունը փոխել ներողամտության։ Քեզ համար անհնարինը փոխել Նրա համար հնարավորով։ Գուցե անհրաժեշտ է, որ ավելի իմաստո՞ւն լինես քո դատողություններում, վերանայե՞ս առաջնահերթություններդ կամ բարելավե՞ս հաղորդակցության հմտություններդ։    

Աստված Իր սիրով քեզ այս քաջալերական խոսքերն է փոխանցում․ «Ես սիրում եմ քեզ հենց այնպիսին, ինչպիսին որ կաս։ Եվ այնքա՜ն եմ քեզ սիրում, որ չեմ կարող քեզ թողնել այդպիսին։ Ես կարո՛ղ եմ քեզ տանել առաջ, բարձրացնել։ Դու կարո՛ղ ես խաղաղության մեջ ապրել․․․ Իմ շնորհը զորավոր կերպով դրսևորվելու է քո տկարության մեջ։ Ես քեզ հետ եմ։ Մի՛ վախեցիր և դժվարություններից փախչելու փոխարեն սովորի՛ր հաղթահարել դրանք»։ 

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։