Սիրելի՛ բարեկամ, աշխարհում չափից շատ են պատերազմները, մեր երկիրը մեծ դժվարություններով է անցնում, և չափից շատ բան կա փոխելու, չափից շատ է տառապանքը մեր շուրջ: Եթե մենք լինենք ուժեղ, մենք կկարողանանք փոխել այս ամենը, հավատո՞ւմ ես:
Մենք ուզում ենք փոխել մեզ անհանգստացնող իրավիճակները դեպի ավելի լավը՝ խաղաղ, կատարյալ իրավիճակներ դարձնել: Բայց ինչպե՞ս կարող ենք դա իրագործել։ Դու կարող ես հարցնել՝ իսկ ի՞նչ կարող եմ ե՛ս անել՝ մեկը, որը երբեմն իրեն այնքան փոքր ու աննշան է զգում, ինչպես մրջյունը հսկա մրջնաբույնի մեջտեղում։ Ինչպե՞ս կարող ենք մենք՝ հասարակ մահկանացուներս, ինչ-որ բան փոխել մեզ շրջապատող աշխարհում:
Աշխարհը փոխելու գործում ամենակարևորն այն է, որ նախ մենք ինքներս մեզ փոխենք, որպեսզի փոխվի մեր ներաշխարհն ու արժեհամակարգը։ Հենց այս մասին է խոսում Աստվածաշունչը Հռոմեացիս 12․2 խոսքում․ «Եվ մի՛ կերպարանվեք այս աշխարհի կերպարանքով, այլ վերափոխվե՛ք ձեր մտքի նորոգությամբ, որպեսզի դուք քննեք Աստծու կամքը, թե որն է բարին, հաճելին ու կատարյալը»:
Ճշմարիտ է, որ «միայն փոխված մարդը կարող է աշխարհ փոխել»,- ասում է Ռիք Ուորրենը:
Եվ սա է Աստծո նպատակը մարդկության համար ըստ Աստվածաշնչի.
- Մովսեսը անձնական հանդիպում ունեցավ Աստծո հետ, ինչը հիմնովին փոխեց նրան՝ նախքան իր ժողովրդին ստրկության գերությունից ազատագրելու առաքելությունը ստանձնելը (տե՛ս Ելից 3․2 խոսքը)։
- Գեդեոնի կարծիքը սեփական անձի և Աստծո մասին փոխվեց՝ նախքան իսրայելացիներին ազատելու մարտահրավերն ընդունելը (տես` Դատավորաց 6-րդ գլուխը)։
- Բացառություն չէր նաև Պողոս առաքյալը, ով իր Փրկչի հետ կուրացնող ու ապշեցուցիչ հանդիպումից հետո դարձավ նախանձավոր ու ջերմեռանդ ավետարանիչ (տես` Գործք 9-րդ գլուխը)։
Աստծու համար թանկ ու սիրելի՛ զավակ, թո՛ւյլ տուր, որ Աստված լիովին փոխի քեզ: Նա աշխարհը փոխելու մի կերպ ունի միայն՝ Նա անում է դա՝ փոխակերպելով անհատներին։
Այդ գործընթացը սկսվում է ինձնից ու քեզնից: Այսօր ե՛կ խորհենք աստվածաշնչյան այս հատվածի շուրջ.
«Սակայն մենք բոլորս, բաց երեսով Տիրոջ փառքը ինչպես հայելու մեջ տեսնելով, նույն պատկերով կերպարանափոխվում ենք փառքի մի աստիճանից դեպի մյուսը՝ առաջնորդվելով Տիրոջ կողմից, որ է Հոգին» (Բ Կորնթացիս 3․18)։
Այո՛, Աստված ուզում է փոխել քեզ շրջապատող աշխարհը… և ուզում է անել դա հենց քո միջոցով․․․ նախ քեզ փոխակերպելու միջոցով։ Դու դեռ ուզո՞ւմ ես փոխել աշխարհը․․․ այս չար ու տառապանքով լեցուն իրականությունը։ Թույլ կտա՞ս, որ Աստված սկսի այդ գործընթացը քեզ փոխելով՝ քեզ Իր կամքը սովորեցնելով և քեզ Իր կամքը սիրող ու Իր բարի, հաճելի և կատարյալ կամքին հնազանդ մարդ դարձնելով։ Թույլ կտա՞ս․․․
Հիշի՛ր, որ դու Աստծո հրաշքն ես, և Աստված սիրում է քեզ։
Շնորհակալ եմ, որ դու կա՛ս։
Դու Աստծո հրաշքն ես:
Աստված ուզում է փոխել քո կյանքը
Ստացիր ամենօրյա քաջալերանքներ
Ուզում ես ստանալ ամենօրյա քաջալերանքները քո էլ․ փոստի՞ն։ Բաժանորդագրվիր «Քո հրաշքն՝ ամեն օր» նամակագրությանը