Ի՞նչ կլիներ, եթե Տեր Հիսուսի մտածելակերպն ունենայիր

Այսօր ավարտում ենք «Ազատվել տագնապի զգացողությունից» գրառումների շարքը, որը հիմնված էր իմ սիրելի աստվածաշնչյան խոսքերից մեկի՝ Փիլիպպեցիս 4․6-7 հատվածի ուսումնասիրության վրա։

Աստվածաշնչում կարդում ենք․ «Ոչնչի համար մի՛ մտահոգվեք, այլ ամեն բանում աղոթքով, աղաչանքով և գոհությամբ՝ ձեր խնդրանքները թող հայտնի լինեն Աստծուն։ Եվ Աստծու խաղաղությունը, որ ամեն մտքից վեր է, ձեր սրտերն ու մտքերը Քրիստոս Հիսուսով կպահպանի» (Փիլիպպեցիս 4․6-7)։

Սիրելի՛ բարեկամ, հուսով եմ, որ այս ընթացքում Աստծո Խոսքի բժշկարար չափաբաժինները հավատքով ընդունելու շնորհիվ տագնապներն ու անհանգստություններն արդեն կորցրել են իրենց ուժը, և հիմա շատ կարևոր է, որ քո սիրտը պահպանվի խաղաղության այդ վիճակի մեջ։  

Աստվածաշունչը պատվիրում է. «Ամենից ավելի քո սի՛րտը պահիր զգուշությամբ, որովհետև նրանից է կյանքի աղբյուրը» (Առակաց 4.23)։

Քո կենսակերպն ու քո ապրելաձևը բխում են քո սրտից: Եթե անհանգստացած ես ու տագնապների մեջ, կապրես անապահովության զգացումով և վաղվա հանդեպ միշտ անորոշության վախերի մեջ: Բայց եթե քո սիրտը վստահում է Աստծուն, ապա դա կդրսևորվի քո կյանքի բոլոր բնագավառներում:

Այսպիսով, ինչպե՞ս պետք է զգուշությամբ պահես սիրտդ, որպեսզի այնտեղ մուտք չգործեն տագնապներն ու անհանգստությունները։ Միայն մեկ ճանապարհ գոյություն ունի դա անելու համար՝ մտքերդ սևեռված պահի՛ր Տեր Հիսուսի վրա։ 

Մենք մեր մտքերն Աստծո վրա ենք կենտրոնացնում և ընդունում ենք Նրա հետ քայլելու այս առողջ սովորությունները՝

• Նրա Խոսքի ամենօրյա ընթերցանությամբ,
• Աղոթքի ամենօրյա հաղորդակցությունների շնորհիվ,
• Երկրպագության արդյունքում
• Եվ Աստծո հետ անցկացրած ժամանակին զուգահեռ։ 

Արդյունքում՝ ավելի քիչ տեղ է մնում հոգուդ վնաս բերող սովորությունների համար, և դու սկսում ես աճել Աստծուն ճանաչելու մեջ։ Այս ամենը քո կյանքում վստահություն է բերում, որ Տերը պաշտպանում է քեզ, իսկ դու սովորում ես նայել աշխարհին և քո կյանքի իրավիճակներին Նրա աչքերով:

Աստծու համար թանկ ու սիրելի՛ զավակ, մեր օրինակը Տեր Հիսուսն է։ Դու Նրան երբևէ անհանգստացած տեսե՞լ ես կամ կարո՞ղ ես պատկերացնել Նրան այդպիսին։

Հիշի՛ր՝ մտածելակերպն է մարդուն դարձնում զորավոր․․․ Իսկ Տեր Հիսուսի նման մտածելակերպ ունենալը մարդու հոգին է դարձնում զորավոր և օգնում է մեզ տագնապներին հաղթելու, անհանգստություններից ազատվելու և մեր հոգսերը Նրան հանձնելու գործում։ 

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։