Ի՞նչ է նշանակում լինել բարի

Այսօր մենք նոր շարք ենք սկսում, որը կրում է «Աստծու բարությունը մեղրից էլ քաղցր է» անվանումը։ Առաջիկա յոթ օրերին մենք խոսելու ենք Տեր Աստծու բարության մասին։ Որքա՞ն հաճախ ենք մենք լսում «Աստված բարի է․․․» արտահայտությունը։ Եվ, սակայն, ոչ պակաս հաճախ՝ «Եթե Աստված բարի է, ապա ինչո՞ւ․․․» խոսքերը։

Սիրելի՛ բարեկամ, երբևէ մտածե՞լ ես, թե ինչ է իրականում նշանակում լինել բարի։ Ո՞վ է բարություն դրսևորել քո հանդեպ։ Ո՞ւմ ենք մենք բարի մարդ անվանում։ Ովքե՞ր են, որ բարիք են արել մեր կյանքերում: Փորձի՛ր մտաբերել քո կյանքի բարի մարդկանց։ Գուցե քո ծնողներին, տատիկին, հեռու բարեկամներից մեկին, դպրոցի ուսուցիչներից կամ ուսուցչուհիներից ոմանց, հարևաններից մեկին կամ ուղղակի մի պատահական անցորդի։

Ինչո՞ւ ես հե՛նց նրանց ընկալում և հիշում որպես բարի մարդիկ։ Ի՞նչ է բարությունը և ինչո՞ւ է Աստվածաշունչը պնդում, որ Աստված բարի է։ Իրականում, մեր հանդեպ դրսևորված բարությունը կապ ունի մեր ունեցած կարիքի հետ։ Երբ որևէ մեկը նկատում է մեր կարիքը և օգնության ձեռք մեկնում մեզ և դա անում է անշահախնդիր կերպով՝ մեր հանդեպ սիրուց ու կարեկցանքից դրդված, ապա մենք նման մարդուն անվանում ենք բարի մարդ, իսկ մեր հանդեպ նրա վերաբերմունքն ու ցուցաբերած օգնությունը՝ բարություն։ 

«Տեր Աստված արև է և վահան, Տերը շնորհք և փառք է տալիս. Տերը ոչ մի բարիք չի խնայում անարատությամբ գնացողներին» (Սաղմոս 84.11):

Աստված սիրում է յուրաքանչյուր մարդու և բարիք չի խնայում Իր առջև անարատությամբ գնացողների համար։ Աստծու բարությունը դրսևորվում է Նրա հոգատարության և գերբնական օգնությունների մեջ։ Սակայն, միևնույնն է, մարդիկ ասում են․ «Եթե Աստված բարի է, ապա ինչո՞ւ․․․» և շարունակության մեջ թվարկում են իրենց կյանքի խնդիրներն ու անպատասխան աղոթքները։ 

Աստծու համար թանկ ու սիրելի՛ զավակ, ես չեմ ճանաչում գեթ մեկ մարդու, որ ճաշակած չլինի Տեր Աստծու բարությունը։ Իրականում, անգամ հավատքից շատ հեռու մարդիկ են ինձ հետ կիսվել և ասել, որ իրենց նեղության մեջ և խորը ճգնաժամային իրավիճակներում խնդրել են Աստծուց օգնություն ու ելք, և Աստված պատասխանել է նրանց աղոթքներին։

Սակայն մարդկային բնույթը ավելի հակված է կենտրոնանալու ներկա իրավիճակի դժվարությունների վրա, քան հիշելու Տեր Աստծու արած բազմաթիվ բարիքները, որոնց համար մենք կասկած չենք ունեցել, որ Աստծուց են եղել։ Եվ եթե դու այսօր քո կյանքում Տեր Աստծու բարության դրսևորման՝ Նրա գերբնական միջամտության և քո իրավիճակում Նրա անըմբռնելի օգնության կարիքն ունես, ապա առաջարկում եմ «Եթե Աստված բարի է, ապա ինչո՞ւ․․․» խոսքերի փոխարեն պարզապես աղոթել և խնդրել Տեր Աստծու միջամտությունը քո կյանքում։ 

«․․․այս բանը հրամայեցի նրանց՝ ասելով. “Լսե՛ք Իմ ձայնը, Ես ձեր Աստվածը կլինեմ, և դուք՝ Իմ ժողովուրդը, և գնացե՛ք այն բոլոր ճամփաներով, որ ձեզ հրամայեցի, որպեսզի ձեզ համար բարի լինի”» (Երեմիա 7.23):

Բարությունը կապ ունի դիմացինի կարիքի կամ իրավիճակի հանդեպ ունեցած արձագանքի հետ։ Աստված բարի է։ Նա ուզում է հոգատարությամբ և բժշկության ու ազատագրության Իր միջամտությամբ արձագանքել քո կարիքին։ Նա սիրում է քեզ։ Սակայն Տեր Աստծուց բարիք ընդունելու համար դու նախ պիտի լսես Նրա՛ ձայնը և պիտի սկսես քայլել Նրա՛ նախանշած ճանապարհներով։ 

Մի՛ հավատա այս աշխարհի մոլորեցնող ձայներին։ Մերժի՛ր այս աշխարհի առաջարկած ճանապարհները։ Ճանաչի՛ր Տեր Աստծու կամքը Աստվածաշնչում և ձգտի՛ր ապրել Նրա Խոսքի սկզբունքներով։ Թո՛ղ Տեր Հիսուսը դառնա քո բարի Հովիվը։ Այդ ժամանակ բարիք և ողորմություն կընդունես Տիրոջից և քո կյանքում իրականություն կդառնան սաղմոսերգուի այս հայտնի խոսքերը․

«Այսպես բարիքը և ողորմությունը կգան իմ հետևից իմ կյանքի բոլոր օրերին, և Տիրոջ տանը կբնակվեմ ամբողջ կյանքիս ընթացքում» (Սաղմոս 23.6):

Աստծու բարությունը մեղրից էլ քաղցր է․․․

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։