Ընդունի՛ր Նրա զորությունը…

Սիրելի՛ բարեկամ, մենք շարունակում ենք խոսել մտերմության և հոգևոր աճի շուրջ։ Այսօր իմ ուղերձը չի լինելու մյուս օրերի ուղերձների նման։ Այսօր ուզում եմ, որ աղոթենք։ Ուղղակի աղոթենք և խնդրենք Աստծուն, որպեսզի Տերը զորացնի մեզ, լինի մեր կողքին ու առաջնորդի մեզ։ 

Այս աղոթքը չափազանց կարևոր է Աստծու մեջ աճելու համար, քանի որ Տերն Իր Խոսքում հստակ ասում է․ «…առանց Ինձ ոչինչ չեք կարող անել» (‭‭Հովհաննես‬ ‭15.5‬):

Աստծու համար թանկ ու սիրելի՛ զավակ, հրավիրում եմ քեզ, որպեսզի աղոթես ինձ հետ միասին այս աղոթքով․․․

«Տե՛ր, Դու Որթատունկն ես, իմ կյանքի և իմ ողջ զորության աղբյուրը։ Առանց Քեզ ես ոչինչ եմ և ոչինչ չեմ կարող անել։ Օգնի՛ր ինձ Քո Սուրբ Հոգով, որպեսզի իմ կյանքի բոլոր օրերին ամուր կառչած մնամ Որթատունկին՝ Քեզ, իմ սիրելի՛ Տեր։ 

Քո պատկերացումներն անհամեմատ բարձր են իմ պատկերացումներից, և երբեմն ես չեմ կարողանում ամբողջովին ընկալել, թե ինչ է նշանակում «Քո մեջ մնալը»։ Սակայն ես մեծ փափագ ունեմ, որ հավատքով շարունակեմ փնտրել Քո երեսն իմ ողջ սրտով, իմ մտքով և զորությամբ։ 

Իմ ցանկությունն է Քեզ համար ապրելը։ Ապրել մի կյանք, որը պտուղներ է տալիս՝ բարի պտուղներ իմ ընտանիքի համար, ընկերներիս, հարևաններիս, աշխատակիցներիս և յուրաքանչյուր մեկի համար, ում հետ առնչվում եմ։ 

Երբեմն ես ասես սպառվում եմ, երբ փորձում եմ գործել իմ ուժերով և ըստ իմ ունեցած իմաստության։ Տե՛ր Հիսուս, ինձ պահիր Քեզ շա՜տ մոտ։ Գիտեմ, որ առանց Քեզ ոչինչ չեմ կարող անել։ Չեմ ուզում ինքս ինձ սպառել… Ուզում եմ ապրել խաղաղության կյանքով։ Ուզում եմ, որ Քո հաղթանակներն իմ կյանքին վստահություն և ցնծություն պարգևեն։ Ուզում եմ զորավոր մեկը լինել Քո Արքայության գործի մեջ։ Իմ ողջ էությամբ ես փափագում եմ օրհնության անոթ լինել Քո՛ փառքի համար։ Այսօր ես որոշում եմ կայացնում, որ իմ զորության աղբյուրը միայն ու միմիայն Դու ես լինելու։ 

Ես սիրում եմ Քեզ, իմ Տե՛ր, և աղոթում եմ Քո սուրբ ու պատվական անունով»։ 

Այսօրվա մեր աղոթքը ներշնչված էր Աստվածաշնչյան այս հատվածից, որում Տերն ասում է. «Ես եմ որթատունկը, իսկ դուք՝ ճյուղերը. ով Ինձ հետ է միավորվում, իսկ Ես՝ նրա հետ, նա շատ պտուղ է տալիս, որովհետև առանց Ինձ ոչինչ չեք կարող անել» (‭‭Հովհաննես‬ ‭15.5‬):

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։