Դու դուրս կգա՛ս քո կյանքի մշուշոտ այս ընթացքից

Սիրելի՛ բարեկամ, երբևէ մեքենայով ճամփորդե՞լ ես մառախուղի ժամանակ։ Այնտեղ, որտեղ մենք ենք ապրում, բավականին խիտ մառախուղներ են լինում ձմռան ամիսներին։ Նման եղանակային պայմաններում մեքենա վարելը թե՛ նյարդայնացնող է և թե՛ վտանգավոր։ Մառախլապատ եղանակը կարող է ազդել նաև մարդկանց տրամադրության վրա, եթե դրա տևողությունը երկարի և օրեր շարունակ մարդը զրկված լինի արևի պայծառ շողերը տեսնելու հնարավորությունից։ 

Մառախուղը նման է անթափանց շղարշի։ Իրականում այն կազմված է ջրի փոքրիկ կաթիլներից, որոնք օդում կախվում են գետնին շատ մոտ և կարող սահմանափակել տեսանելիությանը ընդամենը մի քանի քայլի վրա։ Ընդհանուր առմամբ, մառախուղը ամպ է, որն իջնում է գետնի վրա։ Այնքան էլ հաճելի չէ այդ ամպի միջով ճանապարհ անցնելը, և բավականին մեծ է մոլորվելու կամ ճանապարհից շեղվելու հավանականությունը։

Սակայն այն մառախուղը, որի մասին այսօր պատրաստվում եմ խոսել քեզ հետ, եղանակի հետ կապ չունի։ Այդ մշուշը ծածկում է մեր կյանքի ուղին, խանգարում մեր նպատակակետը տեսնելուն և անորոշ դարձնում մեր ապագան։ Կարծում եմ, յուրաքանչյուր մարդ իր կյանքի որոշակի ժամանակահատվածում անցնում է նման մառախլապատ ժամանակաշրջանով։ Կյանքի մշուշոտ պահերին մենք չգիտենք՝ ի՞նչ ուղի ընտրել կամ ի՞նչ է մեզ սպասվում ճանապարհի վերջում… Նման մառախուղների մեջ մենք մեզ մոլորված ենք զգում։ Եվ հենց այսպիսի ժամանակներում է անփոխարինելի Տեր Աստծու առաջարկած օգնությունը։

«Քո առջևից գնացողը նույն ինքը Տերն է. Նա քեզ հետ է լինելու, Նա քեզ չի թողնի և քեզ չի լքի. մի՛ վախեցիր և մի՛ զարհուրիր» (Բ ՕՐԵՆՔ‬ ‭31:8‬)։

Աստվածաշնչում բազմաթիվ նմանատիպ խոստումներ կան Տեր Աստծու հավատարիմ ժողովրդին և Քրիստոսի ուսուցումներին հնազանդ աշակերտներին։ Այդ խոստումները վստահեցնում են մեզ, որ Աստված ամեն բան վերահսկում է մեր կյանքում։ Նա մեզ առաջնորդում է, երբ մենք չենք տեսնում մեր ճանապարհը և, ի վերջո, ցրելու է մեր կյանքի մառախուղն ու մեր ընթացքը լցնելու է արևի պայծառ շողերով։ 

Աստծու համար թանկ ու սիրելի՛ զավակ, ցանկացած մառախուղ ժամանակավոր է, իսկ Աստված՝ հավիտենական, անփոփոխ և մշտապես հաղթանակող։ Ամուր բռնի՛ր Նրա ձեռքից։ Նա քեզ երբեք չի լքի։ Նա քո երկնային Հայրն է, Ով քեզ այնքա՜ն շատ է սիրում, որ Գողգոթայի խաչի վրա Իր Միածին Որդուն է զոհել հանուն քեզ, որպեսզի հավատաս Նրան և հավիտենական կյանք ունենաս։ 

Տեր Աստծու օգնությամբ և Նրա հետ անցիր քո կյանքի մառախլապատ ճանապարհները։ Կառչի՛ր Աստծո Խոսքի սկզբունքներից։ Հավատքիդ աղբյուրը դարձրո՛ւ Աստծո Խոսքը, այլ ոչ թե սեփական պատկերացումներդ կամ մոլորեցնողների ոգևորիչ ու խորհրդավոր ուսուցումները։ Մնա՛ հավատքի մեջ և կտեսնես, թե ինչպես է մշուշը ցրվում ու կյանքդ լցվում արևի պայծառ շողերով․․․

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։