Բարությունը Տեր Աստծու էությունն է

Շարունակում ենք մեր նոր շարքը, որը կրում է «Աստծու բարությունը մեղրից էլ քաղցր է» անվանումը։ Նախորդ ուղերձի մեջ մենք խոսեցինք այն մասին, թե ինչ է բարությունը և որ Աստված բարի է բոլոր մարդկանց հանդեպ։ Սակայն նշեցինք նաև, որ Տերը Ինքն է պայման դնում Իր բարությունն ընդունելու համար։ Տեր Աստծու ողորմությանը կարող է արժանանալ ցանկացած ոք, սակայն Նրա բարությունը կարող են ընդունել միայն Նրա կամքին հնազանդության որոշում կայացրած և Նրա նախանշած ճանապարհներով ընթացող մարդիկ։

Սիրելի՛ բարեկամ, երբ ասում ենք՝ Աստված բարի է, ապա դա նշանակում է, որ Նա հոգատար, կարեկից, սիրող և վտանգներից պաշտպանող մոտեցում ու վերաբերմունք ունի Իր կողմից արարված մարդկության ու բնության հանդեպ։ Տերը Իր Խոսքում հստակ շեշտադրում է, որ անգամ չար ու ամբարիշտ մարդկանց կործանումը չի կամենում։ Բարությունն Աստծու էությունն է։ Աստված բարի է բոլորի հանդեպ։ Սակայն դա չի նշանակում, որ բոլորն են ունակ վայելելու Տեր Աստծու հոգատարությունն ու խնամքը։ 

«“Կենդանի եմ Ես,- ասում է Տեր Աստված,- և Ես ամբարիշտի մեռնելուց հաճույք չեմ ստանում, այլ որ ամբարիշտը դարձի գա իր ճանապարհից և ապրի։ Դարձե՛ք, դարձե՛ք ձեր չար ճանապարհներից և դուք ինչո՞ւ մեռնեք․․․» (Եզեկիել 33․11):

Մարդիկ սխալ են ընկալում Տեր Աստծու բարությունը։ Մարդկանց մեծամասնությունը չի հասկանում Աստծու բարությունը, քանի որ ուզում է գնալ դեպի չարիք տանող ճանապարհով, ապրել մեղքի ու այս աշխարհի հաճույքների մեջ՝ մերժելով Տեր Աստծու ապաշխարության կոչն ու դարձի գալու հորդորները, և չվնասվել ու չկործանվել։ Սա շատ նման է անապատում Տեր Հիսուսի փորձություններից մեկին, երբ սատանան փորձում էր Նրան համոզել, որ բարձր աշտարակից Իրեն ցած գցի, քանի որ Աստված բարի է և պետք է պահի Նրան կործանումից։ 

«Այդ ժամանակ սատանան Նրան տարավ սուրբ քաղաքը, տաճարի աշտարակի վրա կանգնեցրեց ու Նրան ասաց. «Եթե Աստծու Որդին ես, քեզ ցա՛ծ նետիր, որովհետև գրված է. “Իր հրեշտակներին քեզ համար պիտի պատվիրի, և նրանք քեզ ձեռքերի վրա պիտի բարձրացնեն, որ երբեք ոտքդ քարին չխփես”» (Մատթեոս 4․5-6)։

Այլ խոսքերով ասած՝ սատանան ասում էր, որ եթե Աստված բարի է, ապա ինչ անմտություն էլ անես, Նա քեզ պահելու է կործանումից։ Նա այսօր էլ նույն սուտն է շշնջում միլիոնավոր մարդկանց ականջներին․ «Եթե Աստված բարի է, ապա Նա քեզ կպահի, նույնիսկ եթե դու մեղքի կյանքով ապրես․․․ Եթե չապաշխարես էլ, կփրկի․․․ Եթե Աստծու կամքը արհամարհես էլ և ապրես այնպես, ինչպես դու ես կամենում, ոչ մի չարիքի չես հանդիպի․․․»։

Աստծո համար թանկ ու սիրելի՛ զավակ, բարությունը Տեր Աստծու էությունն է։ Մեր շրջապատում կան չար ու վտանգավոր մարդիկ, առանց որոնց մեր կյանքը շատ ավելի լուսավոր ու խաղաղ կլիներ։ Սակայն Աստված չի կամենում, որ անգամ ամենաչար ու ամենավատ մարդիկ կործանվեն, այլ որ հետ դառնան իրենց չար ճանապարհներից ու ապրեն։ Եվ սա վերաբերում է ոչ միայն ամենաչար մարդկանց, այլև՝ յուրաքանչյուրիս։

Տեր Աստծու բարությունը չի կարող չեղարկել մեր անմտություններն ու կործանման ճանապարհի մեջ հարատևելու անխուսափելի հետևանքները։ Տեր Աստծու բարությունը զգուշացնում է մեզ, որ ապաշխարենք՝ հետ դառնանք մեր չար ընթացքից և ապրենք ըստ մեզ ստեղծած Աստծու պատվիրանների ու Նրա Խոսքի փոխանցած սկզբունքների։

«Կամ կարելի՞ է, որ մի մարդ թեժ ածուխների վրա ման գա, և նրա ոտքերը չայրվեն» (Առակաց 6․28):

Հնարավո՞ր է արդյոք քայլել թեժ կրակների միջով և չայրվել։ Հնարավո՞ր է արդյոք, որ մարդն իրեն ցած գցի բարձր աշտարակից և չվնասվի։ Հնարավո՞ր է արդյոք, որ մարդն ապրի մեղքի կյանքով և մերժի ապաշխարությունն ու դարձի գալը, մերժի Քրիստոսի աշակերտ դառնալու Տեր Աստծու առաջարկը, վայելի այս աշխարհի մեղքի հաճույքներն ու ապրի Աստծու Խոսքի սկզբունքներին հակառակ և չվնասվի ու չկործանվի․․․ 

Ո՛չ։ Դա անհնար է։ Բարությունն Աստծու էությունն է։ Նա բարիք է կամենում անգամ ամենաչար մարդկանց։ Սակայն Աստծուց բարիք ընդունելու պայմանը դարձի գալն է և ապաշխարությունը։ Տեր Հիսուսի պատասխանը սատանային պետք է դառնա մեզնից յուրաքանչյուրի բանալին դեպի Տեր Աստծու բարության գանձերը։ Այո՛, Աստծու բարությունը մեղրից էլ քաղցր է․․․

«Հիսուսը նրան ասաց. «Դարձյալ գրված է. “Տիրոջը՝ քո Աստծուն, չփորձես”» (Մատթեոս 4․7)։

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։