Արդյոք կյանքդ վերանորոգման շրջա՞ն է անցնում․․․

Սիրելի բարեկա՛մ, չգիտեմ ինչպես է քո պարագայում, բայց երբ ես մեքենա եմ վարում և դեպի հերթական փողոց շրջադարձ կատարելիս տեսնում եմ «ճանապարհը վերանորոգվում է» ցուցանակը, ապա հիասթափության ու բարկության մի զգացում եմ ունենում։ Սովորաբար նման պարագաներում կա՛մ պետք է ստիպված լինեմ այլ ճանապարով գնալու, կա՛մ պետք է բավականին դանդաղ անցնեմ վերանորոգվող հատվածով։ Ամեն դեպքում, ժամանակի կորուստն անխուսափելի է լինում․․․

Սակայն եթե ավելի խորը մտածենք, ապա ճանապարհների վերանորոգումը մեզ ապահովում է ավելի լավ ու հարթ փողոցներով ու մայրուղիներով, որտեղ բացակայում են փոսերն ու քանդված հատվածները։ Ի վերջո, վերանորոգումը մեզ համար ավելի անվտանգ ու արագ ընթացք է ապահովում, իսկ նման ճանապարհով մեքենա վարելը ավելի հաճելի է դառնում։ 

Նույն զուգահեռը կարելի է տանել նաև մեր կյանքերի առումով։ Մեզնից յուրաքանչյուրի կյանքում էլ լինում են «վերանորոգման» ժամանակաշրջաններ։ Սրանք այնպիսի ժամանակներ են, երբ Աստված խորապես հիմնանորոգում է մեր ներաշխարհը։ Նա կրակի հնոցով է անցկացնում մեր սիրտը և այրում ամեն բան, որ կուտակել էինք այնտեղ, որոնք սակայն Աստծուց չեն եղել և հակասել են Նրա կամքին։ Իհարկե, նման ժամանակները սկզբում ոչ մի հաճելի բան իրենց մեջ չեն պարունակում, բայց դրանք մեզ ավելի լավն են դարձնում, ավելի ամուր, ավելի ուժեղ, իմաստուն ու համբերատար։ 

Աստվածաշնչում կարդում ենք հետևյալ տողերը․ «Եվ ոչ միայն այսքանը, այլ նաև նեղությունների մեջ ենք պարծենում՝ գիտենալով, որ նեղությունը համբերություն է բերում, համբերությունը՝ փորձառություն, փորձառությունը՝ հույս» (Հռոմեացիս 5․3-4)։

Փորձությունների այս ժամանակներում մենք երբե՛ք չպետք է մոռանանք, որ եթե սիրում ենք Աստծուն, ապա նման ժամանակները մեզ հղկում են, սովորեցնում, խրատում և մղում ավելի ու ավելի նմանվելու Տեր Հիսուս Քրիստոսին։ Աստծո համար թանկ ու սիրելի զավա՛կ, վերանորոգման ժամանակները գրեթե միշտ են ցավոտ, և դրանք մշտապես ուղեկցելու են մեզ մեր երկրային կյանքի ընթացքում։ Բայց ամեն անգամ վերանորոգումից հետո մենք կարող ենք վայելել, թե որքա՜ն գեղեցիկ է դառնում ճանապարհը, որքա՜ն սահուն ու հաճելի է դրանով ընթանալը և որքա՜ն շնորհակալ ենք լինում վերանորոգման բերած արդյունքների համար, երբ դժվարությունների ու փորձությունների հերթական ժամանակաշրջանն արդեն ավարտված է։ 

Շնորհակալ եմ, որ դու կա՛ս։