Աստծու մեծագույն վայելքը

Շարունակում ենք շարքը, որը կրում է «Աստծու բարությունը մեղրից էլ քաղցր է» անվանումը։ Իսկ գիտե՞ս արդյոք, թե որն է Տեր Աստծու մեծագույն վայելքը։ Եթե ուզում ես իմանալ այս հարցի պատասխանը, ապա տո՛ւր քեզ հետևյալ հարցը․ «Ո՞րն է իր զավակին անսահման խորը սիրով սիրող ծնողի մեծագույն վայելքը»։

Սիրելի՛ բարեկամ, գիտե՞ս արդյոք, որ բարի Աստված մեծագույն հաճույք է ստանում, երբ տեսնում է Իր զավակներին ապահով ու երջանիկ։ Սակայն մարդը կարող է հարցնել․ «Այդ դեպքում ինչո՞ւ է Աստված մեզ տարբեր փորձությունների միջով անցկացնում։ Ինչո՞ւ են իմ կյանք այցելում տառապանքներն ու գայթակղությունները»։

«Ոչ ոք փորձության մեջ լինելիս թող չասի՝ «Աստծուց եմ փորձվում», որովհետև Աստված չարից չի փորձվում, Ինքն էլ ոչ մեկին չի փորձում։ Յուրաքանչյուրը փորձվում է՝ իր իսկ ցանկությունից հրապուրվելով ու խաբվելով։ Այնուհետև ցանկությունը հղանալով մեղք է ծնում, իսկ մեղքը հասունանալով ծնում է մահ։ Մի՛ խաբվեք, իմ սիրելի՛ եղբայրներ. ամեն բարի շնորհ և ամեն կատարյալ պարգև վերևից է՝ իջած լույսի Հորից, որի մեջ փոփոխում կամ փոփոխման ստվեր բնավ չկա։ Նա Իր կամքով ծնեց մեզ ճշմարտության խոսքով, որպեսզի մենք Նրա արարածների երախայրին լինենք» (Հակոբոս 1.13-18)։

Տեր Աստծու սիրո ու բարության վերաբերմունքը չի փոխվում անգամ այն ժամանակ, երբ մենք հակառակ ու թշնամի ենք լինում Նրան։

«Եվ դուք, որ մեռած էիք հանցանքների ու մեղքերի պատճառով, որոնց մեջ մի ժամանակ ընթանում էիք այս աշխարհի սովորության համաձայն՝ ըստ կամքի այն իշխանի, որ իշխում է օդային տարածությունից, այն ոգու, որ այժմ ներգործում է ապստամբ որդիների մեջ։ Նրանց թվում նաև մենք բոլորս մի ժամանակ ապրում էինք մեր մարմնական ցանկություններով՝ մարմնի ու մտքի կամքը կատարելով, և էությամբ բարկության արժանի որդիներ էինք մյուսների պես։ Բայց Աստված, որ հարուստ է ողորմությամբ, Իր առատ սիրո համար, որով մեզ սիրեց, մինչ մեռած էինք մեղքերի հետևանքով, մեզ Քրիստոսի հետ կյանք տվեց։ Դուք շնորհով եք փրկված» (Եփեսացիս 2․1-5):

Սակայն մեղքի մեջ հարատևող մարդու կյանքում Տեր Աստծու բարության գործերը բախվում են մի անհաղթահարելի պատնեշի, որը կործանվում է միայն մարդու ապաշխարության ժամանակ։ 

«Տիրոջ ձեռքը վստահաբար չի կարճացել, որ չփրկի, և Նրա ականջը չի ծանրացել, որ չլսի, այլ ձեր անօրենություններն են, որ բաժանում են առաջացնում ձեր և ձեր Աստծու միջև. ձեր մեղքերը ծածկեցին Նրա երեսը ձեզնից, որ ձեզ չլսի, որովհետև ձեր ձեռքերը պղծված են արյունով, և ձեր մատները՝ անօրենությամբ, ձեր շրթունքները սուտ են խոսում, ձեր լեզուն անիրավություն է մրթմրթում» (Եսայիա 59․1-3):

Աստծու համար թանկ ու սիրելի՛ զավակ, բարի Աստված մեծագույն վայելք է ապրում, երբ մենք ապահով ընթացքի մեջ ենք և երջանիկ կյանքով ենք ապրում։ Նրա հայրական սիրտը ցավում է, երբ մենք մեղքի պատնեշով սահմանափակում ենք Նրա զորավոր ձեռքի օգնությունները մեր կյանքում։ Նրա՝ հայրական սիրով լեցուն սիրտը տագնապում է, երբ մենք մեղքերի ու հանցանքների մեջ ենք ապրում և հաճույք ենք ստանում անօրենության կյանքից․․․, երբ չենք գիտակցում, որ Աստծուն ու Նրա Խոսքի սկզբունքները մերժելով՝ գնում ենք օդի իշխանի ճանապարհներով, որ ներգործում է ապստամբության որդիների մեջ։ 

Աստվածաշնչում նկարագրվում է Երկնքում տիրող մի ցնծություն ու ուրախություն, որն ամեն անգամ տեղի է ունենում, երբ Տեր Աստծու զավակներից մեկն ազատագրվում է այս աշխարհի խաբկանքների կապանքից և, ընդունելով Տեր Հիսուս Քրիստոսի առաջարկած հավատքի փրկությունը, խավարի թագավորության ստրկությունից տեղափոխվում է Լույսի Թագավորության ազատության մեջ։ 

«Ասում եմ ձեզ. այդպես էլ Աստծու հրեշտակների մոտ ուրախություն կլինի մեկ ապաշխարած մեղավորի համար» (Ղուկաս 15.10):

Բարի Աստված փափագում է օգնել յուրաքանչյուր մարդու։ Անկախ նրանից, թե ինչ կարծիք ունես ինքդ քո մասին, Աստված սիրում է քեզ և մեծագույն վայելք կապրի, երբ դու ապրես խաղաղ, ապահով և քեզ երջանիկ զգաս։ Տերը փափագում է քեզ տեսնել հե՛նց այսպիսին։ Դրա համար էլ վստահաբար ասում ենք, որ Աստծու բարությունը մեղրից էլ քաղցր է․․․

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։