Նվիրատվության օր. մենք ունենք միմյանց կարիքը

Մենք շարունակում ենք առատաձեռնությանն ու նվիրաբերություններին նվիրված ուղերձների մեր շարքը։ Հույս ունեմ, որ ֆինանսների մասին Աստվածաշնչի փոխանցած ճշմարտություններին ծանոթանալը քեզ համար նույնքան օրհնություն կլինի, որքան ֆիզիկական բժշկությունների կամ կոտրված փոխհարաբերությունների վերականգնման մասին աստվածաշնչյան ճշմարտությունների բացահայտումը։ 

Սիրելի՛ բարեկամ, այսօր խոսելու եմ այն մասին, որ մենք բոլորս ունենք միմյանց կարիքը։ Աստված է այդպես արարել այս աշխարհը։ Անգամ փրկության հարցում Աստված հոգացել է Եկեղեցին՝ որպես փրկված մարդկանց փոխօգնության և միմյանց շնորհ փոխանցելու միջոց։ Ո՛չ մի մարդ միայնակ չի կարող հաղթական ընթացք ունենալ։ Մենք ունենք միմյանց կարիքը։ 

• Մովսեսն առաջնորդությունը փոխանցեց Հեսուին, որն իրեն օգնում էր ծառայության մեջ։ 
• Հռութն ընդունեց Բոոսի օգնությունը՝ իր և Նոյեմիի համար հաց հայթայթելու համար։ 
• Գեդեոնին երեք հարյուր մարդ օգնեց իր ժողովրդի համար փրկության հաղթանակ ապահովելու հարցում։ 
• Նույնիսկ Տեր Հիսուսն օգնության կարիք ուներ, երբ ուժասպառ և անկարող էր Իր խաչը կրել մինչև Գողգոթա։ Իսկ երկրային ծառայության տարիներին Նա նաև ֆինանսական աջակցություն էր ստանում տարբեր մարդկանցից, այդ թվում նաև՝ մի խումբ հարուստ կանանցից, որոնք իրենց սեփական միջոցներից զոհաբերեցին Նրա և աշակերտների կարիքների համար:

Աստծու համար թանկ ու սիրելի՛ զավակ, ինչ ծառայություն էլ Աստված քեզ վստահած լինի, Նա քո կողքին մարդիկ է դնում, որոնք կաջակցեն քեզ քո առաքելությունն արդյունավետ կերպով կատարելու հարցում։ Այս հարցում ես կարող եմ վկայել, որ շատ անգամ եմ զգացել Տեր Աստծու շնորհը և օրհնված եմ իմ կողքին կանգնած ծառայողներով, որոնք Քրիստոսի հավատարիմ ու խոնարհ աշակերտներն են։ Առանց նրանց օգնության ես անկարող կլինեի որևէ արդյունավետ ծառայություն անելու։ 

Քո կողքին դրված մարդիկ նույնպես Աստծուց տրված առաքելության մեջ են, և նրանց առաքելությունը քեզ օգնելն է, ինչպես քոնը մյուսներին օգնելն է։ Եվ այս ամենը՝ հանուն Աստծու Արքայության ընդլայնման և կորածին որոնելու ու ապրեցնելու կարևորագույն առաքելության։ 

«Յուրաքանչյուր ոք ինչ շնորհ ընդունել է, այն իրա՛ր մատակարարեք որպես Աստծու զանազան շնորհների բարի տնտեսներ» (Ա Պետրոս 4.10):

Մենք ունենք միմյանց կարիքը, և Աստված է ուզում, որ դա այդպես լինի… Նա գիտի, որ մեր միաբանության մեջ զորություն կա։ Եվ եթե մենք յուրացնենք միմյանց շնորհ փոխանցելու կարևորագույն որակը, ապա, որպես Քրիստոսի աշակերտներ, շատ ավելի մեծ արդյունավետություն կունենանք այս խավար ու մութ աշխարհից հնարավորինս շատ մարդկանց դեպի Լույսի Թագավորություն առաջնորդելու գործում։ 

Նույնը ճշմարիտ է նաև «Քո հրաշքն ամեն օր» ծառայության պարագայում: Եթե դու օրհնվում ես մեր ամենօրյա ուղերձներով, ապա կարող ես ոչ թե միայն ունկնդիր մնալ, այլև կարող ես աղոթել մեր ծառայության համար, կամ կարող ես աջակցել ցանկացած այլ կերպով, որ Աստված կդնի քո սրտում, կամ էլ կարող ես պարզապես տարածել մեր նյութերը տարբեր սոցիալական ցանցերում և խմբերում։ Մենք քո կարիքն ունենք, որպեսզի ավելի արդյունավետ կերպով ծառայենք Աստծուն և որպեսզի շատերը քաջալերվեն, շատերի կյանքերը վերափոխվեն ու շատերը փրկվեն հավիտենական կորստի հեռանկարից: 

Ե՛կ միասին գործենք հանուն Աստծու Արքայության առաջընթացի և մարդկանց հոգիների փրկության։

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։