Դու կարող ես փոխել պատմության ընթացքը

Սիրելի՛ բարեկամ, այսօր մենք սկսում ենք ուղերձների մի շարք, որը կրում է «Զորություն, որը կարող է փոխել աշխարհը» անվանումը։

Աստվածաշնչում մենք կարդում ենք այնպիսի մարդկանց մասին, ովքեր փոխեցին իրենց շրջապատող աշխարհը: Նրանցից յուրաքանչյուրն ուներ առանձնահատուկ դրական ազդեցություն իր միջավայրում։ Պետք է նշենք նաև այն փաստը, որ այդ ժամանակների մշակույթն ու իրավիճակը, որում նրանք գործում էին, հաճախ, մեղմ ասած, այնքան էլ բարենպաստ չէին նման ազդեցություն թողնելու համար:

Հովսեփը դարձավ Եգիպտոսի կառավարիչը, երբ նույնիսկ եգիպտացի չէր: Դանիելը դարձավ առաջնորդ ու կառավարիչ։ Նա հայտնի էր իր իմաստությամբ ու հարգված՝ Բաբելոնի արքունիքում, երբ ընդամենը մի օտարական ստրուկ էր այդ երկրում: Եսթերը, ով պարզապես մի երիտասարդ հրեա աղջիկ էր, դարձավ թագուհի այն կայսրության մեջ, որտեղ իր ժողովուրդը գերի էր տարվել:

Ուզում եմ քեզ հետ կիսվել մի քարոզչի խոսքերով. «Եթե Աստծո Արքայությունը իր ազդեցությունը չունի եկեղեցում մեր ունեցած վարքագծի ու մեր ապրելակերպի վրա, մենք երբեք չենք կարող ակնկալել, որ Աստված մեզ կզորացնի, որպեսզի ազդեցություն թողնենք մեզ շրջապատող աշխարհի ու մշակույթի վրա»։

Այլ կերպ ասած, որպես Տեր Հիսուսի աշակերտ, քո դերը Տեր Աստծուն հնարավորություն տալն է, որպեսզի Նա ազդեցություն ունենա քո սեփական կյանքի վրա այնպես, որ դու էլ քո հերթին դրական ազդեցություն թողնես քո միջավայրի և քեզ շրջապատող մարդկանց վրա: Բայց սա հնարավոր է քո կյանքում միայն Սուրբ Հոգու գործի շնորհիվ.․․ երբ նախ դու ես փոխվում և Հոգու պտուղները սկսում են դրսևորվել քո կյանքում և առօրյայում:

Եսթերը, Դանիելն ու Հովսեփը ոչ միայն փոխեցին իրենց կյանքի իրավիճակները, այլև իրենց վերաբերմունքի և հավատքի շնորհիվ այնպիսի ազդեցություն թողեցին իրենց ժամանակակիցների վրա և այն աստիճանի փոխակերպեցին նրանց միջավայրը, որ արդյունքում փոխեցին նաև պատմության ընթացքը:

Աստծու համար թանկ ու սիրելի՛ զավակ, հիշի՛ր, որ եթե դու հավատում ես Տեր Հիսուս Քրիստոսին և որոշել ես ապրել Նրա աշակերտի կյանքով, ապա փառքի Արքան ապրում է քո մեջ։ Նա օժտել է քեզ մյուսների կյանքի վրա դրական ազդեցություն թողնելու զորությամբ։ Նա զորացնում է քեզ մարդկանց հոգիները բժշկելու, դեպի փրկություն առաջնորդելու և դրանք ամրացնելու համար։ Հավատո՞ւմ ես այս ամենին․․․ Թույլ կտա՞ս Տեր Հիսուսին նախ փոխակերպել քո կյանքը և հետո նաև մյուսների կյանքերը բժշկել քո միջոցով։ Տերը սպասում է քո որոշմանը․․․ 

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։