Բարության անհաղթահարելի ուժը…

Սիրելի՛ բարեկամ, ուզո՞ւմ ես մյուսների հանդեպ լինել բարի, բարյացակամ ու առատաձեռն։ Ուզո՞ւմ ես իմանալ, թե ինչպես անել դա:

Ե՛կ մի փոքր անդրադարձ կատարենք բառի ստուգաբանությանը:

Բարյացակամություն բառը երկու արմատ ունի՝ բարի և կամենալ: Բարյացակամությունը մյուսների հանդեպ կամավոր կերպով բարին գործելու փափագն է, բարին գործելու կամքը, ուրիշներին օրհնելն ու քաջալերելը:

Արտասահմանում ապրող մի հովիվ մի անգամ պատմում էր, որ որոշ հավատացյալներ ցանկություն են ունեցել նամակ գրել ոստիկաններին ու ասել, որ շնորհակալ են նրանց իրենց արած գործի համար և երախտապարտ են նրանց: Դա բավականին շատ էր հուզել ոստիկանապետին: Նա զարմացել էր ոստիկանների հանդեպ սիրո այս դրսևորումից և ասել էր. «Մեզ ամեն օր անպատվում են: Երբեք չենք հանդիպել մեզ քաջալերող մարդկանց` հատկապես մեր մասնագիտական գործունեության հետ կապված հարցերում»:

Աստվածաշնչում` Եփեսացիս 5․9 խոսքում կարդում ենք. «․․․որովհետև Հոգու պտուղը ամեն բարության, արդարության և ճշմարտության մեջ է»:

Բարի գործերը խոսուն են և իրավիճակ են փոխում: Բարի գործ անելը մի բան է, որ մեզնից յուրաքանչյուրը կարող է անել:

Աստծու համար թանկ ու սիրելի՛ զավակ, դու կանչված ես օրհնության անոթ լինելու համար: Մի՛ վարանիր օգտվել առիթից և առանձնահատուկ  բարի գործեր գործել այսօր: 

 Իսկ ի՞նչ կարող ես անել հենց այսօր։ Դու կարո՞ղ ես․․․

·         Հպվել մարդկանց սրտերին այնպես, ինչպես Աստված է դա անում՝ սիրով ու հարգանքով։

·         Խոսել այնպես, ինչպես Աստված է խոսում՝ պարզ ու զորեղ։

·         Քայլել քո ընթացքն այնպես, ինչպես Աստված է քայլում՝ ուժեղ և վստահ։

·         Սիրել դիմացինիդ այնպես, ինչպես Աստված է սիրում՝ առանց պայմանների ու սահմանների։

Արդյոք նման դիրքորոշում և խոնարհություն ունենալը հնարավո՞ր է: Անկասկած` այո՛: Սակայն դա հնարավոր է միայն և միմիայն Սուրբ Հոգու օգնությամբ և Նրա հետ մտերմության արդյունքում: Եթե դու ճանաչես Տեր Աստծու կամքը և փափագես ապրել Նրա կամքին հնազանդ կյանքով, ապա Աստծու Սուրբ Հոգին կլցնի քո ներսն Իր ներկայությամբ, կուղղորդի քեզ, կխոսի քեզ հետ և կտանի այն ուղղությամբ, որի կարիքն ունես:

Եվ հենց սա՛ է աստվածային լեցունությունը՝ երբ մենք ուրիշների հանդեպ բարին ենք գործում, մենք ստանձնում ենք մեր իրական առաքելությունը:

Ե՛կ միասին ցնծանք այսօր՝ հիշելով, թե որքա՜ն բարի է եղել Տերը մեր հանդեպ, և մենք էլ բարի ու ներող, օգնող ու կարեկից լինենք մեզ այսօր հանդիպած բարի ու ոչ այնքան բարի մարդկանց հանդեպ։ 

Հիշի՛ր, որ դու Աստծո հրաշքն ես, և Աստված սիրում է քեզ։   

Շնորհակալ եմ, որ դու կա՛ս։