Այսօր կարող ես ինչ-որ մեկին օգնել հաշտվելու հարցում 

Սիրելի՛ բարեկամ, այսօր շարունակելու ենք խաթարված հարաբերությունների բժշկության թեմայով մեր զրույցը։

Եվ այսօր միասին կբացահայտենք հաշտության դռներ բացելու ևս մեկ բանալի։

Երբեմն կարող է պատահել, որ թեև մենք կոնֆլիկտային իրավիճակի անմիջական մասնակիցը չենք, սակայն ի վիճակի ենք օգնելու ինչ-որ մեկին այդ խնդիրը հարթելու հարցում։ Այսպիսի հանգամանքներում Տեր Աստված քեզ իմաստություն կտա դա իրականացնելու համար։ Քո շնորհիվ ինչ-որ մեկը կարող է հաշտություն գտնել, և այդ ժամանակ դու դառնում ես հաշտարար։

Մի անգամ մի ուսուցիչ իր աշակերտներին հանձնարարեց թերթիկի վրա գրել իրենց ամենաամոթալի մեղքը կամ ամենավատ գաղտնիքը։ Հետո, նրանց մանրամասնելու շատ ժամանակ չտալով, ընդհատեց նրանց ու հարցրեց․ «Եթե ստիպված լինեիք այդ գաղտնիքը որևէ մեկին ասել, ո՞ւմ կնախընտրեիք ասել այն։ Ինչպիսի՞ հատկանիշներ պետք է ունենար այն անձնավորությունը, որպեսզի նրան վստահեիք»։ 

Աշակերտները սկսեցին նշել հետևյալ հատկանիշները․

• Բարություն,
• Գաղտնիք պահելու ունակություն,
• Սեր,
• Կարեկցանք։ 

Աստծո համար թանկ ու սիրելի՛ զավակ, դու կարո՛ղ ես այսօր ինչ-որ մեկի համար դառնալ խաղաղության ու հաշտության միջնորդ։ Բայց նախ պետք է այդ մարդու համար դառնաս վստահելի մեկը։

Եղի՛ր համարձակ և մի՛ վախեցիր․․․կոնֆլիկտներն անխուսափելի են, բայց դրանք չպետք է հարատև լինեն, որովհետև Աստված մեզ բանալիներ է պարգևել, որոնց միջոցով մենք կառավարում ենք մեր կյանքի լարված հարաբերությունները, որպեսզի դրանք չկառավարեն մեր կյանքը։ Եթե միայն դիմես Տիրոջը և կանչես Նրան, ապա Նրա սերը քեզ մշտապես կուղեկցի, և Նրա Հոգին քեզ կօգնի գտնել կոնֆլիկտները հարթելու ճիշտ մոտեցումները։  

Աստվածաշունչն ասում է․ «Հոգու պտուղն այս է՝ սեր, ուրախություն, խաղաղություն, համբերատարություն, քաղցրություն, բարություն, հավատ, հեզություն, ժուժկալություն։ Այսպիսի բաների դեմ օրենք չկա» (Գաղատացիս 5․22-23)։

Առաջարկում եմ միասին աղոթել այս կարճ աղոթքով․ «Տե՛ր, ես ուզում եմ խաղաղարար լինել, դառնալ այնպիսի մեկը, ով հաշտություն կբերի մյուսների կյանքում։ Օգնի՛ր ինձ ճիշտ խոսքեր և մոտեցում ունենալ, որոնք կօգնեն հարթել բարդ իրավիճակները։ Ես խնդրում եմ Քո իմաստությունն ու սերը, Քո սրտի նման սիրտ եմ խնդրում այդ պահերի համար։ Աղոթում եմ Տեր Հիսուս Քրիստոսի անունով։ Ամե՛ն»։  

Եղի՛ր օրհնված։

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։