Փորձի՛ր պարզապես սկսել և անել առաջին քայլը․․․

Սիրելի՛ բարեկամ, Մարտին Լյութեր Քինգ կրտսերը մի անգամ ասել է. «Հավատքն անում է առաջին քայլը, նույնիսկ երբ չի երևում ամբողջ սանդուղքը»:

Երբեմն մեզ պակասում է մեր հավատքը գործողության մեջ դնելու հե՛նց առաջին քայլը, որպեսզի ինչ-որ բան տեղից շարժվի և առաջ ընթանա: Առաջին քայլը կատարելը քո որոշումն է: Իսկ մեր որոշումները հիմնվում են այն ամենի վրա, ինչի վրա կենտրոնացած է մեր միտքը։

Եթե քո հոգին լցված է կասկածով կամ վախով, ապա միշտ հիշի՛ր, որ դու Տեր Հիսուսի անունով իշխանություն ունես այդ բոլոր մտքերը լռեցնելու համար: Դու զորություն ունես արգելելու այդ մտքերին, որ դրանք տեղ չունենան քո մեջ, որովհետև դու Աստծո զավակն ես, և Նա քո կողքին է և քեզ հետ։

Դու կարող ես որոշում կայացնել գնալու այն ուղղությամբ, որով Սուրբ Հոգին է մղում քեզ։ Այս ուղղությամբ առաջին քայլը կարող է մի մեծ ու սարսափելի դժվարություն թվալ քեզ։ Բայց դա այդպես չէ։ Դա Գողիաթի նման ահասարսուռ է միայն քո երևակայության մեջ։ Եվ որքան այն ավելի հսկայական ես այն պատկերացնում, այնքան ավելի վախեցնող է դառնում այդ առաջին քայլը:

Դու պետք է սովորես նայել իրականությանն Աստծու աչքերով։ Դրան սովորել է պետք։ Եվ դա այնքան էլ դժվար բան չէ: Առաջին քայլերը կարող են լինել այնքան պարզ, որքան ՝

• Հեռախոսազանգ կատարելը։
• Հարցաթերթիկ լրացնելը:
• Զրույց սկսելը։
• Ներողություն խնդրելը։
• Եվ այլն։

Ինչպիսին էլ լինի քո երազանքը՝ երջանիկ ամուսնություն, իմաստալի ու սրընթաց առաջխաղացում աշխատանքի մեջ, առողջ մարմին, ֆինանսական ազատություն կամ որևէ այլ բան, միշտ հիշի՛ր, որ այսօր արդեն հնարավո՛ր է կատարել առաջին քայլն այն ուղղությամբ, որին Աստված մղում է քեզ:

Աստծու համար թանկ ու սիրելի՛ զավակ, երբե՛ք մի վախեցիր առաջին քայլից։ Աստված Ինքն է գնում քո առջևից: Աստվածաշունչն ասում է․ «Ես կքայլեմ քո առջևից, կհարթեցնեմ խորդուբորդ տեղերը, կփշրեմ պղնձե դռները և կկոտրտեմ երկաթյա նիգերը» (Եսայիա 45․2)։

Այսօր կատարի՛ր քո առաջին քայլը դեպի երազանքներիդ իրականացումը։ Այսօր սկսի՛ր փնտրել Աստծու կամքը քո կյանքի ու իրավիճակների համար։ Չվախենա՛ս ու չվարանե՛ս։ 

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։