Իշխանության ցուցիչը

Շարունակում ենք ուղերձների շարքը, որը կրում է «Ճանաչե՛նք Քրիստոսին, որ տարբերենք հակաքրիստոսին» անվանումը։ Զարմանալի է, սակայն Աստվածաշունչը նկարագրում է թե՛ հակաքրիստոսի և թե՛ նրա ծառաների հոգևոր կերպարանքը։ Արտաքինից նրանք շատ նման են լինելու հոգևոր մարդկանց։ 

Սիրելի՛ Ընկեր, բացարձակապես տարբեր են Քրիստոսի և հակաքրիստոսի իշխանության բնույթն ու կիրառությունները։ Տեր Հիսուսի իշխանությունը հոգևոր էր։ Այն հիմնված չէր մարդկանց շատության, համակիրների ակտիվության կամ համախոհների բանակի առկայության վրա։ Սա քաղաքական իշխանությունն է, այլ ոչ՝ հոգևոր։ Տեր Հիսուսի համար կարևորը մարդկանց գովասանքը և այս աշխարհի չափանիշներով հաղթանակած կամ հաջողված լինելը չէր, այլ Տեր Աստծու գովասանքին արժանանալը և Նրա կամքը կատարելը։ 

Հիսուսը պատասխանեց. «Իմ թագավորությունն այս աշխարհից չէ։ Եթե Իմ թագավորությունն այս աշխարհից լիներ, ապա Իմ հետևորդները կպայքարեին, որ Ես հրեաների ձեռքը չմատնվեի. ուստի և Իմ թագավորությունն այստեղից չէ» (Հովհաննես 18.36):

Հենց քաղաքակա՛ն իշխանության հոգևոր շղարշն է լինելու հակաքրիստոսի հիմնական կեղծարարությունը։ Նա իրեն երկրպագող մարդկանց բազմություն է ունենալու և գործելու է հենց մարդկանց իր կողմ ներգրավելու համար։ Նրա իշխանության հիմքը մարդկանց բազմությունն է լինելու, և այդ նպատակին հասնելու համար նա իրեն ներկայացնելու է իբրև Աստված։ 

«․․․այն հակառակորդը, որ գոռոզացած է բոլորի նկատմամբ, որն աստված կամ պաշտամունքի առարկա է անվանվում. մինչև իսկ նա Աստծու տաճարում կնստի և ինքն իրեն ցույց կտա, թե Աստված է» (Բ Թեսաղոնիկեցիս 2․4):

Աստծու համար թանկ ու սիրելի՛ Ընկեր, նույնը ճշմարիտ է նաև Քրիստոսի նվիրյալ ծառայողների և եկեղեցիներում գառան մորթի հագած հակաքրիստոսի ծառաների վերաբերյալ։ Քրիստոսի ծառաների իշխանությունը իրենց Տիրոջ նմանությամբ մարդկանց ծառայելու իշխանությունն է։ Նրանք իրենց տեսնում են, որպես մարդկանց ծառաներ։ Ծառայում են նրանց, քարոզում Աստծու Խոսքի սկզբունքները և մարդկանց մոտեցնում Աստծուն, այլ ոչ թե իրենց։ Այսպիսին չեն եկեղեցի սողոսկած հակաքրիստոսի ծառաները։ Նրանք մարդկանց կապում են իրենց։ Բամբասում ու չարախոսում են մյուս ծառայողներից, որպեսզի շատացնեն համակիրների քանակը և իրենց ավելի վստահ ու զորավոր զգան։ Նրանք ո՛չ թե ծառայում, այլ իշխում են մարդկանց։ Իրենց պահում են որպես հատուկ օծյալների դասակարգի ներկայացուցիչներ ու հավատքի վերնախավ։ Նրանց ու հասարակ մահկանացուների միջև մի անանցանելի հեռավորություն կա, քանի որ իրենց հպարտությունը նրանց շատ ավելի բարձր է դասում սովորական մարդկանցից։ 

«Հիսուսը նրանց Իր մոտ կանչեց ու ասաց. «Գիտեք, որ հեթանոսների մեջ ովքեր իշխան են համարվում, տիրում են նրանց, և նրանց մեծամեծները իշխում են նրանց վրա։ Բայց ձեր մեջ այդպես չպետք է լինի, այլ ձեզանից ով ուզում է մեծ լինել, պետք է ձեր սպասավորը լինի։ Եվ ձեզանից ով ուզում է առաջինը լինել, բոլորի ծառան պետք է լինի։ Որովհետև Մարդու Որդին նույնպես չեկավ, որ Իրեն ծառայեն, այլ որ Ինքը ծառայի ու շատերի համար Իր կյանքը որպես փրկագին տա» (Մարկոս 10.42-45):

Հակաքրիստոսը և նրա ծառաները մարդկանց օգտագործում են իրենց իշխանության ամրապնդման համար։ Քրիստոսը և նրա ծառաները Աստծուց տրված իրենց իշխանությունն օգտագործում են մարդկանց ծառայելու և նրանց փրկության առաջնորդելու համար։ Իշխանության ցուցիչին ուշադրություն դարձնելը քեզ կօգնի տարբերել հակաքրիստոսի և Քրիստոսի ծառաներին։ 

Շնորհակալ եմ, որ դու կա՛ս։