Երկրպագության ցուցիչը
Շարունակում ենք ուղերձների շարքը, որը կրում է «Ճանաչե՛նք Քրիստոսին, որ տարբերենք հակաքրիստոսին» անվանումը։ Բացարձակապես տարբեր են լինելու Քրիստոսի երկրպագությունը և հակաքրիստոսի երկրպագությունը։ Երկրպագությունը ևս մեկ ցուցիչ է, որի շնորհիվ հնարավոր է լինելու բացահայտել հակաքրիստոսին ու նրա ծառայողներին։
Սիրելի՛ Ընկեր, Քրիստոսի երկրպագության հիմքում Աստծու սերն է, որը մղում է անձը ուրանալուն ու խաչը վերցնելուն։ Հակաքրիստոսի երկրպագության հիմքում աշխարհի սերն է լինելու։ Նկարագրվում է, որ նրա շեշտադրումը բարեկեցությունն է լինելու։ Նա մարդկանց մղելու է աշխարհասիրության և մամոնայի երկրպագության։
Տեր Հիսուսը սովորեցնում էր գանձերը Երկնքում դիզելու մասին։ Հակաքրիստոսը ճիշտ հակառակն է շեշտադրելու։ Երկրպագությունը նվիրում է։ Երկրպագությունը որոշում է արժեհամակարգը։ Երկրպագությունը հնազանդություն է և փափագ՝ հաճեցնելու նրան, ում սիրում ես։
«Ոչ ոք չի կարող երկու տիրոջ ծառայել, որովհետև կա՛մ մեկին կատի և մյուսին կսիրի, կա՛մ մեկին կմեծարի և մյուսին կարհամարհի։ Չեք կարող ծառայել և՛ Աստծուն, և՛ մամոնային։ Դուք նախ Աստծու արքայությունն ու Նրա արդարությո՛ւնը փնտրեք, և այդ ամենը ավելիով ձեզ կտրվի» (Մատթեոս 6․24,33):
Սա Տեր Հիսուսի շեշտադրումն էր։ Հակաքրիստոսի ու նրա ծառաների շեշտադրումը հակասելու է այս ուսուցմանը։ «․․․այն հակառակորդը, որ գոռոզացած է բոլորի նկատմամբ, որն աստված կամ պաշտամունքի առարկա է անվանվում. մինչև իսկ նա Աստծու տաճարում կնստի և ինքն իրեն ցույց կտա, թե Աստված է» (Բ Թեսաղոնիկեցիս 2․4):
Աստծու համար թանկ ու սիրելի՛ Ընկեր, Քրիստոսի ու Նրա ծառաների նվիրման հիմքում հոգով ու ճշմարտությամբ երկրպագությունն է լինելու։ Հոգևորությունը պետք է հիմնված լինի ճշմարտության խոսքի՝ Աստվածաշնչի վրա։ Մյուս կողմից՝ հակաքրիստոսի ու նրա ծառաների երկրպագության հիմքում մարմնավորությունն է լինելու։ Կրոնավորությունը մարմնավորության ծածկոցն է։ Եվ չարի ծառաները եկեղեցիներում ապրելու են մամոնայի երկրպագության ներքո և մարմնավորության կյանքով։
Երկրպագությունը լավագույն ցուցիչներից մեկն է, որն օգնելու է մեզ բացահայտելու իրական ու կեղծ հավատացյալներին, Քրիստոսի ծառաներին ու հակաքրիստոսի ծառաներին եկեղեցիներում։ Մամոնան, մարմնավորությունը և աշխարհասիրությունը մի կողմից, անձը ուրանալը, հոգով ու ճշմարտությամբ առաջնորդվելը մյուս կողմից բացահայտելու են իրական երկրպագությունը։ Մի կողմից դիմակազերծվելու են հակաքրիստոսի պաշտոնյաները, մյուս կողմից հաստատվելու է Քրիստոսի իրական աշակերտների ինքնությունը։ Տերը իմաստություն տա բոլորիս, որ մերժենք մամոնայի երկրպագությունը, մարմնավոր կյանքը և աշխարհասիրության բոլոր դրսևորումները։ Այդ ժամանակ մեր աչքերը բաց կլինեն և մենք կզանազանենք կեղծիքն ու ճշմարիտը։
Շնորհակալ եմ, որ դու կա՛ս։
