Երբ մարդը նեղանում է Աստծուց․․․

Երբևէ ունեցե՞լ ես այսպիսի մտքեր․ «Արդյոք Աստված լսո՞ւմ է իմ աղոթքները։ Ինչո՞ւ Նա թույլ տվեց իմ ընտանիքում պատահած դեպքերը։ Ինչո՞ւ Նա չի միջամտում և կարգավորում իմ աշխատանքն ու ֆինանսները։ Ինչո՞ւ չի կարգավորում իմ անձնական հարաբերությունները»։

Սիրելի՛ բարեկամ, Աստվածաշունչն ասում է, որ Աստված կատարյալ բարի է և Իր զավակների համար լավագույնն է կամենում։ Այսպիսով, ինչո՞ւ ենք մենք երբեմն նման խնդիրների բախվում և նման մտքեր ունենում։

Մեր կյանքում լինում են ժամանակներ, երբ մեր հավատքի ընթացքն առանց մեծ խնդիրների է անցնում։ Սակայն լինում են նաև ժամանակներ, երբ անցնում ենք սաստիկ փոթորիկներով և դժվարություններով։ Կյանքի ծանրագույն իրավիճակներում, երբ մենք բազմաթիվ հարցեր ենք ունենում և չենք հասկանում, թե ինչո՞ւ է այդ ամենը մեզ հետ պատահում, միևնույնն է, Աստծու բնույթի մեջ ոչինչ չի փոխվում՝ Նա սեր է և Իր զավակների համար լավագույնն է կամենում։

Աստվածաշնչում կարդում ենք հետևյալ տողերը. «Եվ մենք ճանաչեցինք ու հավատացինք այն սիրուն, որ Աստված ունի մեր նկատմամբ։ Աստված սեր է. ով սիրո մեջ է ապրում, Աստծու մեջ է ապրում, Աստված էլ՝ նրա մեջ» (‭‭Ա Հովհաննես‬ ‭4․16‬‬‬)։

Իհարկե, Հոբի օրինակը մեզ հուշում է, որ մենք կարող ենք կյանքի ծանրագույն պահերին հարցեր ուղղել մեր Տեր Աստծուն։ Նա մեր Հայրն է, և իրավիճակները չըմբռնելու պատճառով ծագած մեր հարցերը Նրան չեն նեղացնում կամ անակնկալի բերում։

Աստծո համար թանկ ու սիրելի՛ զավակ, եթե սրտիդ խորքում նեղված ես Աստծուց քո կյանքի հարվածների ու կորուստների պատճառով, ապա ուզում եմ վստահեցնել քեզ, որ քո կյանքի ցավի ու տառապանքի հեղինակն Աստված չէ։ Աստվածաշունչը պնդում է ճիշտ հակառակը։ Աստված կամենում է Իր զավակներին ազատել մեղքի ապականության պատճառով չարիքով լցված այս աշխարհի արհավիրքներից։

Այսօր ուզում եմ քեզ հորդորել, որ ինչ վիճակում էլ լինի քո սիրտը, ինչպիսի արհավիրքներ էլ հասած լինեն քո կյանքում, երբե՛ք ու երբե՛ք չհեռանաս Աստծուց։ Նա դժվարությունների մեջ մեր հույսի միակ աղբյուրն է և մեր ուժասպառության մեջ մեզ Իր զորությամբ լցնող Տերը։ Մեր կյանքի դժվարագույն պահերին մենք ավելի մեծ փափագով պետք է փնտրենք Նրա բժշկարար ներկայությունը։

Առաջարկում եմ միասին աղոթել այս աղոթքով․ «Իմ բարի ու սիրող Հա՛յր, շնորհակալ եմ, որ Քո ծրագրերն ինձ համար բարի են, այլ ոչ թե աղետաբեր, և որ Դու Քո շնորհքով ու ողորմություններով ես լցնում իմ կյանքը։ Շնորհակալ եմ, որ ինձ ուժ ես տալիս հաղթահարելու իմ կյանքի դժվարությունները և որ իմ հույսի աղբյուրն ես կյանքիս անհույս թվացող իրավիճակներում։ Խնդրում եմ՝ օգնի՛ր ինձ, որ սովորեմ վստահել Քեզ ցանկացած իրավիճակում։ Ես գիտեմ, որ Դու սիրում ես ինձ և իմ կյանքի ծանրագույն իրավիճակներն անգամ դեպի բարին ես գործածում, քանի որ ես էլ Քեզ եմ սիրում։ Այո՛, իմ Տե՛ր, Դու բարի Հայր ես ինձ համար։ Աղոթում եմ Տեր Հիսուսի սքանչելի անունով։ Ամե՛ն»։

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։