Հաջողված աղոթքի գաղտնիքը

Մոտենում ենք ուղերձների շարքի ավարտին, որը կրում է «Ի՞նչ է աղոթքը և ինչպե՞ս աղոթել» անվանումը։ Մենք արդեն անդրադարձել ենք հաջողված աղոթքի չափանիշներին և գիտենք, որ իրապես հաջողված աղոթքը Տեր Աստծու ներկայության մեջ Նրանից մխիթարություն, շնորհ և օգնության զորություն ընդունելն է, որոնք օգնում են մեզ հասկանալ տվյալ իրավիճակում Տեր Աստծու կամքն ու գործել ըստ Նրա բարի, հաճելի ու կատարյալ կամքի։ 

Սիրելի՛ Ընկեր, իսկ ո՞րն է հաջողված աղոթքի գաղտնիքը։ Ովքե՞ր են, որ աղոթքի կյանքում հասնում են վերը բերված չափանիշների իրականություն դառնալուն։ Ո՞ւմ աղոթքներն են հաճելի Աստծուն։ Ո՞ւմ է Նա լսում։ Ո՞ւմ է պատասխանում։ Եվ ո՞ւմ է զորացնում Իր շնորհի առատությամբ։ 

Ուզում եմ քեզ հետ կիսվել աստվածաշնչյան երեք ճշմարտություններով, որոնք քո կյանքում կբացահայտեն հաջողված աղոթքի գաղտնիքը։ 

ա․ Աստված լսում է կոտրված հոգի ունեցողներին։ «Եվ արդ, այսպես է ասում Բարձրը, Բարձրյալը, հավիտենության մեջ բնակվողը, որի անունը Սուրբ է. «Ես բնակվում եմ բարձունքում և սուրբ տեղում, բայց բեկված և խոնարհ հոգի ունեցող մարդու հետ եմ լինում, որպեսզի վերակենդանացնեմ խոնարհների հոգին, վերակենդանացնեմ բեկվածների սիրտը» (Եսայիա 57․15):

բ․ Աստված պատասխանում է արդար կյանքով ապրող աստվածավախ մարդկանց։

«Գիտենք, որ Աստված մեղավորներին չի լսում, բայց եթե մեկն աստվածապաշտ է ու Նրա կամքը կատարում է, նրան լսում է» (Հովհաննես 9․31):

«Տերը մոտիկ է բոլորին, որ Իրեն են կանչում. այն բոլորին, որ ճշմարտությամբ կանչում են Իրեն։ Նա կատարում է Իրենից վախեցողների կամքը և լսում է նրանց աղաղակը ու փրկում է նրանց» (Սաղմոս 145․18-19):

գ․ Աստված շնորհ է տալիս խոնարհներին։ 

«Նույնպես և դուք, երիտասարդնե՛ր, հնազանդվե՛ք ծերերին, բոլորդ միմյանց նկատմամբ խոնարհությո՛ւն ունեցեք, որովհետև «Աստված ամբարտավաններին հակառակ է, իսկ խոնարհներին շնորհ է տալիս» (Ա Պետրոս 5.5):

Աստծու համար թանկ ու սիրելի՛ Ընկեր, կոտրված հոգի ունենալը, արդար ու աստվածավախ կյանք ապրելը և խոնարհության վերաբերմունք ունենալը մարդու աղոթքը դարձնում են Աստծու համար հաճելի և ցանկալի։ Այո՛, Աստված Ինքն է փափագում նման մարդու հետ հաղորդակցվելու և Նրա աղոթքներին Իր կամքի համեմատ պատասխանելուն։ Աստված հստակ ասում է Իր Խոսքի մեջ, որ Իրեն հաճելի են խոնարհ, կոտրված հոգի ունեցող և Աստծու Խոսքից դողացող մարդիկ։ 

«Այսպես է ասում Տերը. «Երկինքն Իմ գահն է, և երկիրը՝ Իմ ոտքերի պատվանդանը։ Որտե՞ղ է այն տունը, որ կառուցում եք Ինձ համար, և ո՞րն է Իմ հանգստյան վայրը։ Այդ բոլորը Իմ ձեռքն է արել, և այդ բոլորը եղել են,- ասում է Տերը։- Ահա թե Ես ո՛ւմ եմ հայում՝ խոնարհին, կոտրած հոգի ունեցողին և Իմ խոսքից դողացողին» (Եսայիա 66․1-2):

Ուզո՞ւմ ես, որ քո աղոթքը լինի հաջողված և Աստված Իր զորավոր ներկայությամբ և Իր Հոգու զորակցությամբ, քաղցրությամբ ու շնորհով լցնի քո աղոթքները։ Հիշի՛ր կոտրված հոգի ունենալու մասին։ Հիշի՛ր արդարության ու աստվածավախության կյանքով ապրելու կարևորության մասին։ Եվ հիշի՛ր խոնարհներին խոստացված աստվածաշնչյան բոլոր օրհնությունների մասին։