Իրական աստվածապաշտությունը

Մեր հաջորդ ուղերձով մենք ավարտելու ենք ուղերձների շարքը, որը կրում է «Աստվածաշնչի օրհնությունները քո կյանքում» անվանումը։ Երեսուն ուղերձներից կազմված այս շարքը նվիրված է YouVersion աստվածաշնչյան հավելվածի (bible.com) մեկ միլիարդ բաժանորդի սահմանագծի հատման աննախադեպ իրադարձությանը։

Սիրելի՛ Ընկեր, տարբեր մարդիկ տարբեր կերպ են պատկերացնում հավատքի կյանքն ու իրական աստվածապաշտությունը։ Սակայն Աստվածաշունչը նաև այս հարցին է հստակ պատասխան տալիս ու մեզ փոխանցում Տեր Աստծու ակնկալած կյանքն Իրեն հավատացող յուրաքանչյուր անհատից։

«Սուրբ և անարատ կրոնասիրությունն Աստծու ու Հոր առաջ այս է՝ որբերին և այրիներին նրանց նեղության ժամանակ այցելել և ինքն իրեն աշխարհից անարատ պահել» (Հակոբոս 1․27):

Այս հստակ խոսքը կարծես արձագանքում է Տեր Հիսուսի փոխանցած երկու պատվիրանների ճշմարտությանը։

«Դպիրներից մեկը, որ լսում էր նրանց վեճը և տեսավ, որ Հիսուսը սադուկեցիներին լավ պատասխանեց, մոտեցավ ու Նրան հարցրեց. «Ո՞րն է ամենակարևոր պատվիրանը»։ Հիսուսը նրան պատասխանեց. «Առաջին և ամենակարևոր պատվիրանը սա է՝ "Լսի՛ր, Իսրայե՛լ, մեր Տերը՝ Աստված, միակ Տերն է։ Եվ սիրի՛ր քո Տեր Աստծուն քո ամբողջ սրտով, ամբողջ հոգով, ամբողջ մտքով ու ամբողջ զորությամբ"։ Սա է առաջին պատվիրանը։ Իսկ երկրորդը սրան նման է՝ "Սիրի՛ր քո ընկերոջը քո անձի պես"։ Սրանցից ավելի մեծ պատվիրան չկա» (Մարկոս 12:28-31):

Աստծու համար թանկ ու սիրելի՛ Ընկեր, սեփական անձն աշխարհից անարատ պահելը սրբության կյանք ապրելու մասին է։ Աստծուն սիրել ամբողջ սրտով, ամբողջ մտքով ու ամբողջ զորությամբ նշանակում է չսիրել աշխարհն ու աշխարհի մեղավոր հաճույքները։ Առանց Աստծու կամքին հնազանդության փափագի չկա և չի կարող լինել անկեղծ աստվածապաշտություն։ Տեր Աստծուն սիրել նշանակում է պահել Նրա պատվիրանները։ Տեր Աստծուն սիրել նշանակում է աշխարհից անարատ պահել սեփական անձը։ Մերձավորին սեփական անձի պես սիրելու պատվիրանն աստվածապաշտության կյանքի մյուս կարևոր բաղադրիչն է։ Այցելել կարիքավորներին՝ որբերին ու այրիներին, օգնություն տրամադրել դժվարության մեջ լինողներին, հիվանդներին, բանտարկյալներին, կերակրել սովածներին և այլն։ Աստված ակնկալում է, որ մենք, Իրենից ներում ու ողորմածություն ընդունելով, նույնը կանենք մեր շրջապատի մարդկանց հանդեպ։ Եվ կանենք դա այնպես, ինչպես կուզեինք, որ մեր հանդեպ անեին, եթե մենք լինեինք նման կարիքի մեջ։ 

«Այդ ժամանակ թագավորն իր աջ կողմում կանգնածներին կասի. "Եկե՛ք, իմ Հորից օրհնվածնե՛ր, ժառանգե՛ք աշխարհի սկզբից ձեզ համար պատրաստված թագավորությունը։ Որովհետև քաղցած էի, և դուք ինձ ուտելիք տվեցիք, ծարավ էի, և ինձ խմելու բան տվեցիք, օտար էի, և ինձ ձեզ մոտ ընդունեցիք, մերկ էի, և ինձ հագցրիք, հիվանդ էի, և ինձ խնամեցիք, բանտում էի, և ինձ այցելեցիք"։ Այդ ժամանակ արդարները նրան կպատասխանեն ու կասեն. "Տե՛ր, ե՞րբ քեզ քաղցած տեսանք և կերակրեցինք, կամ ծարավ ու խմելու բան տվեցինք։ Ե՞րբ քեզ օտար տեսանք ու մեզ մոտ ընդունեցինք, կամ մերկ և հագցրինք։ Ե՞րբ քեզ հիվանդ տեսանք կամ բանտում ու քեզ այցելեցինք"։ Եվ թագավորը կպատասխանի ու նրանց կասի. "Ճշմարիտ եմ ասում ձեզ. քանի որ իմ այս փոքր եղբայրներից մեկին արեցիք, ի՛նձ արեցիք» (Մատթեոս 25․34-40):

Աստծու կամքին հնազանդ սրբության կյանք ապրելով և մյուսներին Աստծուց տրված հնարավորություններով ու շնորհներով ծառայելով՝ իրական աստվածապաշտության կյանք ապրող հավատացյալն արտացոլում է Տեր Հիսուսի բնույթն ու որակները, ինչպես նաև հնազանդվում Տեր Աստծու հանձնարարականին։