Ֆինանսական իմաստության խորհուրդներ

Մենք շարունակում ենք ուղերձների շարքը, որը կրում է «Աստվածաշնչի օրհնությունները քո կյանքում» անվանումը։ Այն նվիրված է YouVersion աստվածաշնչյան հավելվածի (bible.com) մեկ միլիարդ բաժանորդի սահմանագծի հատման աննախադեպ իրադարձությանը։

Սիրելի՛ Ընկեր, ֆինանսական խնդիրները մարդուն կարող են մղել տարբեր սխալների, հանցագործություննների, հարաբերությունների խաթարման, անգամ՝ ընտանիքի կործանման և շատ այլ սխալ որոշումների ու ողբերգությունների։ 

Սակայն եթե մենք կրկին մեր հայացքն ուղղենք Սուրբ Գրքին, ապա կտեսնենք, որ իմաստության ու բացարձակ ճշմարտության միակ Աղբյուր Աստվածաշունչը մեզ ուսուցումներ ու խորհուրդներ է փոխանցում նաև առաջին հայացքից ոչ այնքան հոգևոր թվացող այս թեմայի շուրջ։ 

«Որովհետև արծաթասիրությունը բոլոր չարիքների արմատն է, որին ձգտելով՝ ոմանք հավատից մոլորվեցին ու իրենք իրենց բազում ցավեր պատճառեցին» (Ա Տիմոթեոս 6․10):

Փողի ու հարստության հանդեպ սերը մարդուն տանում է դեպի հավատքի ճշմարիտ կյանքից շեղումների, մոլորության և շատ ցավերի ու հարվածների, որոնք անխուսափելի են արծաթասիրության ծուղակն ընկած մարդկանց կյանքերում։ 

Փողասիրությունը մարդուն մղում է Տեր Աստծու պատվիրաններն անտեսելուն։ Արծաթասեր մարդիկ ֆինանսական որոշակի շահ ունենալու համար պատրաստ են լինում կեղծիքների ու խարդախությունների, կեղծ տվյալներ պետությանը տրամադրելուն և ակնհայտ սուտ տեղեկություններ պարունակող փաստաթղթեր ստորագրելուն։ 

Վերը բերված աստվածաշնչյան զգուշացումը շեշտադրում է ֆինանսական շահը Տեր Աստծու հետ մտերմության հարաբերությունից վեր դասելու վտանգների մասին։ Ֆինանսների առումով Աստվածաշունչը սովորեցնում է նաև ագահության, նախանձի և մամոնայի պաշտամունքի կործանարար հետևանքների մասին և վստահեցնում, որ Իրեն ամեն բանից առավել սիրող մարդկանց համար Աստված հրաշալի մի խոստում ունի։ 

«Վարքն առանց արծաթասիրության թող լինի. բավարա՛ր համարեք այն, ինչ ձեռք եք բերել, որովհետև Ինքն իսկ ասաց. «Քեզ չեմ թողնելու ու չեմ լքելու» (Եբրայեցիս 13․5):

Աստծու համար թանկ ու սիրելի՛ Ընկեր, այս աշխարհը բոլոր հնարավոր միջոցներով քարոզում է, որ ֆինանսը մարդու երջանկության աղբյուրն է։ Քարոզում է ֆիլմերի ու գովազդների միջոցով, քարոզում է ապրանքների ու ուղևորությունների գովազդների մեջ, ինչպես նաև քարոզում է մարդկանց միջոցով, որոնք մեր կողքին են և, թեև ապրում են խարդախության ու ամբարշտության կյանքով, սակայն հաջողված են թվում այս կյանքում։ Անշուշտ, Աստվածաշունչը սովորեցնում է ֆինանսների կարևորության մասին, սակայն հանուն ֆինանսների Աստծու սրբության պատվիրանները վաճառելը հավասարեցվում է հավատուրացության։ Արծաթասիրությունից զգուշացումը Աստծու սիրո դրսևորումներից է։ Ընդունի՛ր այսօր Աստվածաշնչի այս կարևորագույն օրհնությունը և կտեսնե՛ս, թե ինչպես է Տերը Իր հոգատարությամբ շրջապատում քեզ։ «Եվ քիչ էր մնացել, որ ոտքերս ծռվեին, և բան չէր մնացել, որ քայլվածքս սահեր։ Որովհետև նախանձեցի ամբարտավաններին՝ ամբարիշտների խաղաղությունը տեսնելով, Եվ ես միտք արեցի, որ այդ իմանամ, սակայն դժվար էր իմ աչքի առաջ, Մինչև որ Աստծու սրբարանը մտա և նրանց վերջն իմացա։ Հիրավի, Դու նրանց հեշտ սահելու տեղեր ես դնում, կործանվելու մեջ ես գցում նրանց» (Սաղմոս 73.2-3,16-18):