Ծառը պտուղից են ճանաչում

Այս ուղերձով մենք ավարտում ենք ուղերձների շարքը, որը կրում էր «Ճանաչե՛նք Քրիստոսին, որ տարբերենք հակաքրիստոսին» անվանումը։ Հույս ունեմ, որ այս յոթ ուղերձներն օգնեցին քեզ ճանաչելու Քրիստոսի իրական բնույթն ու այդ բնույթն իրենց մեջ ունեցող և այն զարգացնող իրական Աստծո ծառաներին՝ Քրիստոսի ճշմարիտ աշակերտներին և Նրա եկեղեցու նվիրյալ ծառայողներին։

Սիրելի՛ Ընկեր, հույս ունեմ նաև, որ նախորդ ուղերձները և այս ուղերձը կօգնեն նաև հակաքրիստոսի կրոնավոր ու մարմնավոր էությունը բացահայտելու հարցում, ինչպես նաև այդ նույն էությամբ մեր օրերում եկեղեցի սողոսկած, գառան մորթի հագած գայլերին բացահայտելու հարցում։ 

«Սիրելինե՛ր, ամեն ջանք թափեցի, որ ձեզ մեր ընդհանուր փրկության մասին գրեմ. հարկ եղավ, որ գրեմ ձեզ ու խնդրեմ, որ պայքարեք մեկընդմիշտ սրբերին ավանդված հավատի համար. որովհետև սողոսկեցին ձեր մեջ ոմանք, որոնք վաղուց սահմանված էին սույն դատաստանի համար, ամբարիշտներ, որոնք մեր Աստծու շնորհն անառակության վերածեցին և ուրանում են այն միակ Իշխանին և մեր Տիրոջը՝ Հիսուս Քրիստոսին» (Հուդա 1․3-4):

Ինչպե՞ս է հնարավոր տարբերել եկեղեցի սողոսկած այս մոլորեցնողներին։ Տեր Հիսուսը սովորեցնում էր, որ մենք նայենք նրանց կյանքի պտուղներին։ 

«Զգո՛ւյշ եղեք սուտ մարգարեներից, որ ձեզ մոտ են գալիս ոչխարի հանդերձով, բայց ներքուստ հափշտակող գայլեր են։ Իրենց պտուղների՛ց նրանց կճանաչեք․․․» (Մատթեոս 7․15-16):

Հուդա առաքյալը երեք աստվածաշնչյան կերպար է ներկայացնում, որոնք օգնում են մեզ հակաքրիստոսի ծառաներին բացահայտելու հարցում։ 

«Վա՜յ նրանց, որ Կայենի ճանապարհով են ընթանում ու Բաղաամի մոլորությամբ վարձին են նվիրվում և Կորխի պես հակառակվելով կործանվում են։ Սրանք կեղտոտ բծեր են, որոնք, ձեր սիրո ճաշին մասնակցելով, միասին աներկյուղ ուտել-խմելիս իրենց անձերն են գիրացնում։ Անջուր ամպեր են՝ քամիներից քշված, աշնան պտղակորույս ծառեր՝ կրկնակի մեռած, արմատախիլ եղած, ծովի կատաղի ալիքներ, որ իրենց ամոթն են փրփրեցնելով թափում, մոլոր աստղեր, որոնց համար է պահված հավիտենական խավարի վիհը» (Հուդա 1․11-13):

Կայենի ճանապարհը եղբորը նախանձելու և նրան ատելու ճանապարհն է։ Հակաքրիստոսի ծառաները կորցնում են իրենց խաղաղությունը, երբ որևէ մեկն իրենց շրջապատում հաջողվում է կամ հասնում որևէ բարձունքի ու Աստծու գործի մեջ որևէ առաջընթաց է գրանցում։ Այդ նախանձն ու ատելությունը նրանց մղում է չարախոսության, ստախոսության ու բամբասանքների։ Սա հակաքրիստոսի ոգին է։ Քրիստոսի Հոգին ունեցողները միայն ցնծում և ուրախանում են, երբ մեկ այլ ծառայող հանուն Աստծու Արքայության առաջընթաց է գրանցում, հաջողվում կամ բարձրանում ծառայության մեջ։ 

Բաղաամի մոլորության վարձին նվիրվելը Աստծուց ընդունած հոգևոր պարգևներն ու տաղանդները ֆինանսական շահի համար կիրառելն է։ Հոգևոր ծառայողի կյանքում հստակ երևում է շահամոլությունը, փողասիրությունը կամ ծառայության դիմաց ֆինանսական օրհնություն ստանալու ակնկալիքը։ Արծաթասիրության գերի այս մարդկանց կյանքում ամեն բան որոշվում է ֆինանսական շահի չափով և սահմանափակվում աշխարհասիրության ծախսերի հաճույքների տիրույթով։ Սա հակաքրիստոսի ոգին է։ Քրիստոսի Հոգին ունեցողները երբե՛ք հոգևոր ծառայությունը չեն դիտում որպես ֆինանսական շահի աղբյուր։ 

«Երբ գնաք, քարոզե՛ք ու ասե՛ք, որ Երկնքի Արքայությունը մոտեցել է։ Հիվանդներին բժշկե՛ք, մեռելներին հարությո՛ւն տվեք, բորոտներին մաքրե՛ք, դևերին հանե՛ք. ձրի ստացել եք, ձրի էլ տվե՛ք» (Մատթեոս 10․7-8):

Աստծու համար թանկ ու սիրելի՛ Ընկեր, ամենադժվարը մոլորեցնողների վերջին տեսակը զանազանելն է։ Նրանք Կորխի հակառակության շարունակողներն են մեր ժամանակներում։ Կորխն իր վրա Աստծուց դրված իշխանություն ուներ, որը Մովսեսն էր։ Հարցը Մովսեսի ճիշտ կամ սխալ լինելու մասին չէր, այլ նրա՝ Աստծուց դրված լինելու մասին։ Կորխը ծպտված ապստամբություն էր հասունացնում՝ անձնական զրույցների ժամանակ բողոքելով Մովսեսից, չարախոսելով, բամբասելով և վատ լույսի ներքով ներկայացնելով Աստծուց իր վրա կարգված առաջնորդին։ Սա հակաքրիստոսի ոգին է։ Քրիստոսի Հոգին ունեցողները երբե՛ք չեն գործում խավարի ծածկոցի ներքո, այլ ուղիղ կերպով բարձրացնում են հարցերը և լուծում դրանք հե՛նց այն մարդկանց հետ, որոնցից դժգոհ են կամ որոնց հետ անհամաձայնություն ունեն։ 

«Եթե եղբայրդ քո դեմ մեղանչի, գնա հանդիմանի՛ր նրան, երբ դու և նա առանձին լինեք» (Մատթեոս 18․15):

Ամեն ծառ իր պտուղից է ճանաչվում։ Կայենի, Բաղաամի և Կորխի բնույթը կրող հոգևոր ծառայողները հակաքրիստոսի ոգով առաջնորդվող մարդիկ են։ Քրիստոսի Հոգին ունեցողները չեն կարող գործել նրանց նմանությամբ։ Նրանց օրինակը իրենց Տերն է՝ Հիսուս Քրիստոսը։ «․․․եթե մեկը Քրիստոսի Հոգին չունի, նա Նրան չի պատկանում» (Հռոմեացիս 8․9):

Շնորհակալ եմ, որ դու կա՛ս։