Խաղաղությունը հնարավոր է միայն հաղթանակից հետո

Մենք շարունակում ենք շարքը, որը կրում է «Մտքի պատերազմի զենքերը» անվանումը։ Աստված ամեն բան հոգացել է մեր հաղթանակի համար։ Աստված զորավոր զենքեր է մեզ փոխանցել հոգևոր պատերազմում թշնամուն կործանիչ հարվածներ հասցնելու և ստության ու կրակոտ մտքերի գրոհներին դիմակայելու համար։ 

Սիրելի՛ Ընկեր, մենք չպետք է խուսափենք խավարի դեմ ընթացող հոգևոր այս պատերազմից։ Այն ընթացքի մեջ է միշտ։ Դրանից պետք չէ վախենալ կամ խուսափել մտքի պատերազմի առճակատումներից։ Պետք է հմտանալ, փորձառություն ձեռք բերել, սովորել հոգևոր զենքերի կիրառության կերպերը և խորհուրդներ ընդունել ավելի փորձառու հոգևոր ծառայողներից։ 

«Օրհնյա՜լ է Տերը, իմ Վեմը, որ ձեռքերս սովորեցնում է կռիվ անելու և իմ մատները՝ պատերազմելու» (Սաղմոս 144․1):

Եթե դու նվիրվես Քրիստոսի աշակերտը դառնալու օրհնյալ ընթացքին, ապա հավատարիմ աշակերտության պարագայում կսովորես հոգևոր զենքերի արդյունավետ կիրառությունը։ Եփեսացիս 6․14-18 հատվածի հոգևոր զինատեսակները կիրառելու մեջ հմտանալը մեր հոգևոր հաղթանակների գրավականն է։

Ճշմարտության գոտին մեր ամրությունն է։ Սուտը տեղ չպետք է ունենա մեր շուրթերին անգամ առօրյա ու անմեղ թվացող ստերի տեսքով։ Արդարության կյանքը մեր պաշտպանությունն է։ Այն մեր զրահն է, որ պաշտպանում է մեզ թշնամու հարձակումներից։ Ավետարանը տարածելու պատրաստակամությունը, հավատքի վահանը, Աստծու Խոսքը, աղոթքը և աղոթքի մեջ հարատևելը մեր զենքերն են, որոնք կիրառել ու այդ կիրառության մեջ հմտանալ է անհրաժեշտ։ 

Աստծու համար թանկ ու սիրելի՛ Ընկեր, ծուլությունը աշակերտի առաջին թշնամին է։ Մերօրյա հավատացյալները ավելի շատ սպասում են, որ ինչ-որ մեկն աղոթի իրենց համար, և իրենց բոլոր խնդիրները լուծվեն։ Շատ քիչ են Քրիստոսի աշակերտները, որոնք հմտանում են հոգևոր զինատեսակների կիրառության մեջ։ 

Խաղաղությունը հնարավոր է միայն հաղթանակից հետո։ Հոգևոր հաղթանակները մարդուն վստահություն են ներշնչում։ Հոգևոր հաղթանակները մարդուն հաստատուն միտք են տալիս։ Հոգևոր պարտությունները անհուսություն ու կասկածներ են ծնում։ Սակայն Աստված քեզ համար հաղթական ընթացք և կատարյալ խաղաղություն է հոգացել։ 

«Հաստատուն միտք ունեցողին Դու պահում ես կատարյալ խաղաղության մեջ, քանզի Քեզ է հուսացել» (Եսայիա 26․3):

Շնորհակալ եմ, որ դու կա՛ս։