Անկեղծ աղոթքները հստակ աղոթքներն են

Ինչի՞ համար ենք մենք աղոթում․․․ Կարո՞ղ ենք անկեղծորեն քննել՝ արդյո՞ք մեր աղոթքի կյանքը հիմնված է Աստծու կամքը ճանաչելու և ըստ Նրա կամքի աղոթելու վրա, թե՞ մեր ցանկությունների ու քմահաճույքների վրա: Ի՞նչ ենք անում, երբ հստակ չգիտենք, թե ում կամ ինչի համար աղոթել:

 

Սիրելի՛ Ընկեր, Աստվածաշնչում կարդում ենք․ «Առանց տեսիլքի ժողովուրդը սանձարձակ կդառնա.․․»: (Առակաց 29.18):

 

Շատ կարևոր է մեր կյանքի համար Տեր Աստծո կամքին համահունչ, հստակ տեսիլք ունենալը: Որպեսզի բացահայտենք մեր արարման և լույս աշխարհ գալու իմաստն ու պատճառը, Աստված երբեմն թույլ է տալիս, որ մենք անցնենք անապատային ժամանակաշրջաններով։ Նման ժամանակներում մենք պետք է սովորենք համբերել և չհուսահատվել՝ վստահ լինելով, որ անապատից հետո մուտք ենք գործելու խոստացված երկիրը։ Մեր կյանքի «անապատներում» կարևոր է հավատքով սպասել սովորելը և հարատև աղոթքի փորձառության մեջ հմտանալը։ 

 

Իրականում, ոչ միայն մենք ենք անցնում կյանքի անապատային շրջաններով, այլև մեր մտերիմներն ու մեր շրջապատի մարդիկ։ Ահա թե ինչու եմ խրախուսում քեզ` կանոնավոր կերպով գրի առնել քո շրջապատի մարդկանց և քո աղոթքի խնդրանքները: Դրանք կարող են լինել, օրինակ.

 

• Նրանց համար, ովքեր բժշկության կարիք ունեն։ 

• Քո կողակցի համար, որպեսզի նա մոտենա Աստծուն։

• Հենց քեզ համար՝ քո աշխատանքի, ֆինանսների, հոգնածությունից ազատվելու և այլն։

 

Աստծու համար թանկ ու սիրելի՛ Ընկեր, քո երկնային Հայրը ցանկանում է քեզ տալ հայտնություն քո կյանքի և քո գոյության յուրաքանչյուր ոլորտի համար: Նա փափագում է, որ դու բացահայտես քեզ համար Նրա սահմանած կանչվածությունը։ 

 

Մի՛ մոռացիր, որ Աստված չի անտեսում ու չի մոռանում քո աղոթքները: Աղոթի՛ր հստակ աղոթքներ, որոնք համահունչ են Աստծու կամքին։ Աստծու կամքը ճանաչի՛ր Աստվածաշնչի միջոցով։ Եթե փնտրես Աստծուն ու Նրա կամքը, ապա անպայման կգտնես Նրան: Նա Ինքն է փափագում հայտնել Իրեն Իր զավակներին։ Փնտրի՛ր և կբացահայտես նաև քո կանչվածությունը։

 

Շնորհակալ եմ, որ դու կա՛ս։