Տերն ասում է քեզ՝ «Մի՛ հուսահատվիր»

Մենք շարունակում ենք «Եղի՛ր ուժեղ և համարձակ» անվանումը կրող ուղերձների շարքը, որը հիմնված է Հեսու 1․9 խոսքի ուսումնասիրության վրա։

 

«Ահա պատվիրում եմ քեզ, զորացի՛ր և քա՛ջ եղիր, մի՛ վախեցիր և մի՛ զարհուրիր, որովհետև քո Տեր Աստվածը քեզ հետ է ամեն տեղ, ուր էլ որ գնաս» (Հեսու 1․9):

Սիրելի՛ Ընկեր, այսօր Տերն ասում է քեզ՝ «Մի՛ զարհուրիր»:

Աբրահամ Լինքոլնը մի առիթով ասել է. «Եթե թույլ չտաք, որ ձեզ հետապնդի հուսահատության զգացումը, ապա, ի վերջո, Դուք անպայման հաջողության եք հասնելու»:

 

Հաճախ մեզ ավելի շատ վնասում է ոչ թե մեզ հետ պատահածը, այլ հենց մեր սխալ արձագանքը տվյալ իրավիճակին։ Պատկերացրեք՝ մեկն իր անձնական կյանքում բախվում է շատ անախորժ իրավիճակի և սկսում է ծխել, եթե դադարեցրել էր ծխելը, կամ խմել ալկոհոլային խմիչքներ և փչացնել թե՛ իր հոգևոր վիճակը և թե՛ առողջությունը։ Մյուսը կարող է նման իրավիճակներին արձագանքել ինքնամփոփ դառնալով։ Մեկ ուրիշը՝ չափից դուրս նյարդային դրսևորումներով։ Իսկ ոմանք էլ՝ շատակերությամբ։ Մեր արձագանքները կարող են շատ տարբեր լինել։ Ի վերջո, տվյալ անախորժ իրավիճակը մեզ այնքան շատ չի վնասում, որքան մեր սխալ արձագանքն այդ իրավիճակին։ Եվ այս ամենի պատճառը հուսահատությունն է։ Այն նման է մարդու կյանքի արատավոր մի շրջանի, երբ մարդը սկսում է կառավարվել հուսահատության հրահանգներով, սակայն այդ հրահանգները երբեք ի վիճակի չեն լինում շտկելու ստեղծված իրավիճակը:

Հեսուն հուսահատվելու և զարհուրելու շատ պատճառներ ուներ. նոր երկիր, կամակոր ու մեծ ժողովուրդ և հզոր թշնամիներ: Բայց Աստված, այնուամենայնիվ, նրան ասում է. «Մի՛ զարհուրի՛ր, մի՛ վհատվիր և մի՛ հուսահատվիր: Եթե դու թույլ տաս քեզ վախենալ, եթե հանձնվես, հուսահատվես, ապա արդեն իսկ պարտված ես։ Դու պետք է քաջություն ընդունես Ինձնից և ամրանաս Իմ մեջ: Ես քեզ հետ եմ, և դու կարող ես հաղթել, Ե՛ս եմ քեզ զորացնողը»։

 

Աստված մեզ նույնպես Իր քաջալերական խոսքն է ուղղում այսօր․ «Մի՛ վախեցիր, որովհետև Ես քեզ հետ եմ, մի՛ զարհուրիր, որովհետև Ես քո Աստվածն եմ։ Ես քեզ կզորացնեմ և կօգնեմ քեզ, նաև քեզ նեցուկ կլինեմ Իմ արդար աջով» (Եսայիա 41․10):

 

Ժամանակավոր հուսահատությունը նման է զգացմունքային վիրուսի: Մշտական հուսահատությունը նման է զգացմունքային խորը հիվանդության: Առաջինը բուժելը շատ ավելի հեշտ է, քան երկրորդը: Սակայն Աստծո համար երկուսի բուժումն էլ հնարավոր է։ Եթե զգում ես, որ քեզ պատում է հուսահատությունը, ապա մի՛ ուշացրու և թույլ մի՛ տուր, որ վախը քո ներսում բույն դնի: Հայացքդ ուղղի՛ր Տեր Հիսուսին։ 

 

Ահա՛ թե ինչ խորհուրդ է տալիս Աստվածաշունչը․ «․․․նայի՛ր հավատի զորագլխին ու այն կատարողին՝ Հիսուսին, որն Իր առջև դրված ուրախության փոխարեն խաչը հանձն առավ և ամոթն արհամարհելով՝ Աստծու աթոռի աջ կողմում նստեց։ Ուրեմն Նրա՛ մասին մտածիր, ով մեղավորների կողմից իր դեմ այսպիսի հակառակություն կրեց, որպեսզի դու չհոգնես և չհուսահատվես» (Եբրայեցիս 12․2-3):

 

Աստծու համար թանկ ու սիրելի՛ Ընկեր, Տեր Հիսուսը տառապեց, որպեսզի ես և դու լցվենք հույսով և հավատով: Նա կարո՛ղ է քեզ հանել կյանքի ցանկացած ծանր իրավիճակից։ Նա ի զորու է քո ներսի դատարկությունը լցնել Իր ներկայության ուրախությամբ և քաղցրությամբ։ Իսկ եթե հուսահատությունը չափազանց երկար է արդեն քո ներսում, ապա մենք պատրաստ ենք օգնելու քեզ, որպեսզի քայլ առ քայլ մոտենաս Աստծուն և թույլ տաս, որ Աստված բժշկի քո հոգու վերքերն ու վերականգնի քո ուրախությունը։ Գրի՛ր մեզ, և մենք սիրով կծառայենք քեզ․․․

 

Շնորհակալ եմ, որ դու կա՛ս։