Դու երբե՛ք մենակ չես…

Սիրելի՛ բարեկամ, երբեմն այս աշխարհի լուրերը, անձնական հարաբերությունները կամ մեր կյանքի որոշ բարդ իրավիճակներ կարող են գողանալ մեր խաղաղությունն այնպես, ասես մենք պայքարի մեջ ենք մի անտեսանելի թշնամու դեմ: 

Մեր կյանքի ամենադժվարին իրավիճակներում Տեր Հիսուսը մեր կողքին է: Նա երբե՛ք մեզ չի լքում և չի թողնում մենակ մեր խնդիրներին դեմ հանդիման: Տեր Աստծու ներկայությունը խաղաղեցնում է մեր հոգին, մեր սիրտն ու մեր անձը: Ահա թե ինչ է ասում սաղմոսերգուն. «Հիրավի, իմ անձը հանդարտեցրի և հանգստացրի մոր կաթից կտրված մանկան պես, իմ անձը՝ կաթից կտրված մանկան պես» (Սաղմոս 131.2):

Եթե դու որոշել ես ապրել Տեր Հիսուսի ուսուցանած ճշմարտություններով, ապա Նա քեզ հետ է լինելու քո կյանքի բոլոր օրերին: Տերն է քո խաղաղությունը այսօր և ընդմիշտ: Դու կարող ես հանգիստ ու խաղաղ լինել Նրա կողքին, և լինել շատ մոտ Նրա սրտին: 

Աստծու համար թանկ ու սիրելի՛ զավակ, Տեր Հիսուսը մի զորավոր խոստում ունի, որը վերաբերում է միայն Նրա կամքին հնազանդ աշակերտներին: Դարձի՛ր Նրա հավատարիմ աշակերտը: Դարձի՛ր Նրա կամքին հնազանդ կյանքով ապրող հավատացյալ: Դարձի՛ր Աստծուն սիրող և Նրա հանձնարարած առաքելության իրագործմանը նվիրված քրիստոնյա: Այդ պարագայում դու երբե՛ք մենակ չես մնա քո խնդիրների ու դժվարությունների դեմ պայքարում: Տերը խոստում ունի: Նա քեզ երբե՛ք մենակ չի թողնի: 

«…սովորեցրե՛ք նրանց պահել այն ամենը, ինչ ձեզ պատվիրեցի։ Եվ ահա Ես ձեզ հետ եմ բոլոր օրերին մինչև աշխարհի վերջը»։ Արդ գնացե՛ք, աշակե՛րտ դարձրեք բոլոր ազգերին՝ նրանց մկրտելով Հոր, Որդու և Սուրբ Հոգու անունով» (Մատթեոս 28.19-20):

Առաջարկում եմ աղոթել միասին այս կարճ աղոթքով. «Շնորհակալ եմ, Տե՛ր Հիսուս Քո սիրո և խաղաղություն պարգևող ներկայության համար: Շնորհակալ եմ Քո հոգատարության ու խնամքի համար: Շնորհակալ եմ Քո կատարյալ խաղաղությամբ իմ կյանքի փոթորիկները հանդարտեցնելու համար: Դու իմ խաղաղությունն ես, Տե՛ր: Քո շնորհիվ ես հանգիստ եմ, խաղաղ և ապահով: Աղոթում եմ Քո սուրբ ու պատվական անունով: Ամե՛ն»:

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։