Աստված միշտ քո կողքին է…

Հավանաբար, դու էլ ինձ նման կյանքի ծանր պահերին մեծ փափագով ակնկալել ես, որ ինչ-որ մեկն օգնության ձեռք մեկնի․․․

Այս առումով Աստվածաշունչը մի կարևոր ճշմարտություն է մեզ փոխանցում․ «Իմ օգնությունը Տիրոջից է, որ արարեց երկինքն ու երկիրը։ Նա չի թողնի, որ քո ոտքը սահի. քո պահապանը չի քնի։ Ահա Իսրայելի պահապանը, որ չի ննջելու և չի քնելու։ Տերը քո պահապանն է. Տերը քեզ հովանի է քո աջ ձեռքի մոտ» (Սաղմոս 121.2-5):

Սիրելի՛ բարեկամ, Աստված միշտ մեր կողքին է։ Նա մեր հովանին է։ Նա ծածկում է մեզ կիզիչ արևից և պաշտպանում մեզ այս կյանքի փոթորկոտ քամիներից ու անձրևներից։ Ոչ մի ուժ չի կարող ստիպել, որ Նա հեռանա քեզնից։ Երբ արթնանաս, Նա քո կողքին է: Երբ պառկում ես քնելու, Նա կրկին քեզ հետ է:

Երբ խոսում ես ինչ-որ մեկի հետ, Նա ներկա է… (տե՛ս Սաղմոս 139)։

Ուր էլ որ գնաս, Տերը քեզ հետ է։ Նա քո պաշտպանն է՝ քո ապահովությունը։

Եթե դու հավատում ես Աստծուն և կյանքդ նվիրել ես Նրա կամքը ճանաչելուն և այդ կամքին հնազանդվելուն, ապա բարի ու գթասիրտ Աստված ուշադրությամբ հետևում է քո յուրաքանչյուր քայլին և ծածկում է քեզ Իր քաղցր ու ջերմ ներկայությամբ… Դու երբե՛ք մենակ չես:

Աստծու համար թանկ ու սիրելի՛ զավակ, առաջարկում եմ հենց հիմա մի քանի րոպե տրամադրել Աստծո հետ զրուցելու համար։ Պարզապես շնորհակալություն հայտնի՛ր ու գովաբանի՛ր Նրան քո խոսքերով:

Եվ մի բան եմ ուզում ասել քեզ։ Եթե օրհնվում ես ամենօրյա այս ուղերձներով, ապա ինչո՞ւ չտարածել դրանք քո շրջապատի մարդկանց մեջ։ Փորձի՛ր տարածել այս ուղերձը և անհատապես ուղարկել մի քանի հոգու, որոնց Սուրբ Հոգին կառաջնորդի, որ ուղարկես անհատական նամակով։ Այդ կերպ նրանք նույնպես կքաջալերվեն Աստծու Խոսքով, կամրանան հավատքի կյանքի մեջ և կփառավորեն Տիրոջ անունը քեզ հետ միասին։

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։