Տե՛ր, շնորհակալ եմ այն ամենի համար, ինչն արդե՛ն ունեմ:
Սիրելի Ընկեր, այսօր ուզում եմ կիսվել քեզ հետ իրական հարստության մասսին մի պատմությամբ։ Ե՛կ միասին խորհենք դրա շուրջ:
Մի օր մի շատ հարուստ հայր իր որդուն տարավ ճամփորդության, որպեսզի ցույց տա, թե ինչպես են ապրում աղքատները: Նրանք կանգ առան մի ագարակում և հյուրընկալվեցին մի աղքատ ընտանիքի, որը նրանց հյուրասիրելու շատ բան չուներ:
Երբ վերադարձան տուն, հայրը հարցրեց որդուն.
Հավանեցի՞ր ճամփորդությունը:
Այո, հայրիկ, շա՜տ:
Տեսա՞ր, թե ինչպես են ապրում աղքատ մարդիկ:
Այո՛, - պատասխանեց որդին։
Եվ ի՞նչ դաս քաղեցիր ճամփորդությունից:
Որդու պատասխանը հետևյալն էր. «Ես տեսա, որ մենք ունենք մեկ շուն, իսկ նրանք` չորսը: Մենք ունենք լողավազան, որը հասնում է մինչև այգու մեջտեղը, իսկ նրանք` մեծ գետեր, որոնց մեջ նրանք ողջ օրը կարող են լողալ: Մենք մեր պարտեզում ունեք լապտերներ, իսկ նրանց գիշերը աստղերն են լուսավորում: Մեր բակը մինչև դիմացի այգին է, իսկ նրանցը` մինչև հորիզոնը: Մենք մի փոքր տարածք ունենք ապրելու համար, իսկ նրանց առջև անծայրածիր դաշտերն են: Մենք ունենք ծառաներ, ովքեր ծառայում են մեզ, իսկ նրանք ծառայում են միմյանց: Մենք գնում ենք մեզ համար ուտելիք, իսկ նրանք աճեցնում են իրենց ուտելիքը: Մենք մեզ պաշտպանելու համար մեր տունը շրջապատել ենք բարձր պարսպով, իսկ նրանք իրենց պաշտպանելու համար ունեն բազմաթիվ ընկերներ»։
Տղայի հայրն ասես պապանձվեց:
Տևական լռությունից հետո տղան հավելեց. «Հայրի՛կ, անչափ շնորհակալ եմ, որ ինձ ցույց տվեցիր, թե ինչ է իրենից ներկայացնում հարուստ լինելը»։
Այն, ինչը մեկի համար անարժեք մի բան է, մյուսի համար մեծ արժեք ունի: Ամեն ինչ կախված է նրանից, թե ո՞ր տեսանկյունից ես նայում։
Սիրելի Ընկեր, իսկ ի՞նչ է քեզ համար իրական հարստությունը: Իրեր, առարկաներ, դիրք, հեղինակություն և նման բանե՞ր, թե՞ Աստծո հետ մտերմությունը, քո ներքին խաղաղությունը, ընկերությունը և այլն:
Մի ասացվածք կա, որն ասում է․ «համեմատությունը սպանում է գոհունակությունը»: Սակայն հաճախ մենք մոռանում ենք իրական հարստությունը և փոխարենը տրտմում ենք այն ամենի համար, ինչ չունենք կամ ինչը փափագում ենք ունենալ:
Աստվածաշունչն ասում է. «Սակայն աստվածապաշտությունը գոհունակության հետ միասին մեծ շահ է։ Որովհետև ոչինչ չենք բերել այս աշխարհ և ոչինչ էլ չենք կարող տանել։ Ուտելիք և հագուստ ունենք, դրանցով բավարարվենք» (Ա Տիմոթեոսին 6:6-8):
Գոհունակություն ու երախտագիտությունը Աստծո Արքայության երկու հիմնարար արժեքներ են, որոնք չափազանց կարևոր է, որպեսզի մենք ամեն օր կիրառենք մեր կյանքում: Թեև Աստված փափագում է հոգալ մեր կարիքները, մենք պետք է սովորենք գոհանալ այն ամենով, ինչ ունենք այսօր:
Աստծո համար թանկ ու կարևոր Ընկեր, ես քաջալերում եմ քեզ հենց այսօր շնորհակալ լինել Աստծուց այն ամենի համար, ինչ Նա արդեն իսկ տվել է քեզ: Հիշի՛ր, որ․․․ «Նրա աստվածային զորությունը մեզ շնորհեց կյանքին և աստվածապաշտությանը վերաբերող ամեն ինչ՝ ճանաչեցնելով նրան, ով մեզ կանչեց փառքով ու առաքինությամբ» (Բ Պետրոս 1․3)։
Շնորհակալ եմ, որ դու կա՛ս։
