Դարձի՛ր Երկնային Արքայության դեսպան

«Տարածի՛ր Հիսուս Քրիստոսի Բարի Լուրը և կդառնաս Երկնային Արքայության դեսպանը»:

Սիրելի՛ բարեկամ, ես աննկարագրելի երջանկության զգացողություն եմ ունենում, երբ լսում եմ այն մարդկանց վկայությունները, որոնց կյանքերը փոխակերպվել են Աստծո սիրո շնորհիվ: Այդ պատճառով առաջիկա օրերին կկիսվեմ քեզ հետ մշակութային քրիստոնեությունից դեպի իրական հավատքի քրիստոնեություն փոխակերպման մի քանի հրաշք պատմություններով: Այս վկայությունները իմ շրջապատի մարդկանց կյանքից են։ 

Այսօրվա պատմության հերոսի անունն Իսահակ է։ Ահա նրա պատմությունը.

«Նախքան Աստծուն անձնապես ճանաչելը՝ ինձ թվում էր, թե բոլոր մարդիկ, որոնք ծնվում են քրիստոնեական երկրներում, ինքնաբերաբար դառնում են քրիստոնյաներ: Եվ քանի որ ծնվել էի Հայաստանում, ես էլ շատերի նման ինձ համարում էի քրիստոնյա․ վանքերի կողքով անցնելիս խաչակնքվում էի, ժամանակ առ ժամանակ ներս էի մտնում տաճար, մոմ վառում, աղոթք անում, և այսքանով սահմանափակվում էին քրիստոնեական կյանքի մասին իմ պատկերացումները:

Բայց մի շատ սովորական օր, որը գրեթե ոչնչով չէր տարբերվում մյուսներից, հանկարծ կարծես ինչ-որ մեկը խոսեր ինձ հետ։ Ֆիզիկապես ես ոչինչ չէի լսում, բայց սրտիս ու մտքիս մեջ այնքան հստակ ու պարզ լսվում էր այդ ձայնը․․․ Այն ասում էր՝ տան այսինչ սենյակի պահարանում Ավետարան է դրված, վերցրո՛ւ և սկսի՛ր կարդալ։ Նախքան այդ պահը ես անգամ չգիտեի, որ մենք այդպիսի գիրք ունենք: Ի զարմանս ինձ՝ Ավետարանը ճիշտ այդ տեղում էր: Սկզբում չէի կարողանում հասկանալ, թե ինչը կամ ով էր ինձ հետ խոսողը, բայց հիմա կասկած չունեմ, որ Տեր Հիսուսն էր սրտիս հետ խոսողը: 

Ես շարունակ կարդում էի Ավետարանը, կարդում էի այն հատվածները, որտեղ Հիսուսի աշակերտները միշտ միասին էին, կամ որ մեկտեղ հավաքվելը չպետք է թողնել, և աղոթում էի, որ Աստված ինձ անկեղծ հավատացյալ մարդկանց հանդիպեցներ: Եվ մի օր այնպես ստացվեց, որ ծանոթացա հավատացյալ մարդու հետ, ով առաջարկեց իր հետ եկեղեցի գնալ։ Որոշեցի համաձայնել ու գնացի եկեղեցի: Այդ օրը հասկացա, որ Աստված կանչում է ինձ ապաշխարելու և իրապես Իր զավակը դառնալու:

Անկեղծորեն պետք է ասեմ, որ մեկ օրում իմ բոլոր թերությունները չվերացան ու խնդիրները չլուծվեցին։ Ավելին, հավատացյալ դառնալու փաստը ավելի շատ խնդիրներ ստեղծեց ինձ համար, բայց Տեր Հիսուսը խոստացել է, որ մեզ մենակ չի թողնի: Վախերը, միայնությունը, մեղքի կապանքը այլևս չկան։ Տեր Հիսուսը վերցրեց դրանք և փոխարենը տվեց փրկություն, խաղաղություն, մեղքից ազատ կյանք… Հիմա ես իմ կյանքը նվիրել եմ Աստծուն ու մարդկանց ծառայելուն»:

Աստծու համար թանկ ու սիրելի՛ զավակ, պատկերացնո՞ւմ ես՝ ինչպիսի՜ տոն է եղել Երկնքում և ի՜նչ ցնծություն՝ Իսահակի փրկության համար:

Ես քեզ կոչ եմ անում Արքայության Բարի Լուրը տարածել այն մարդկանց շրջանում, որոնք դեռ չեն ճանաչում Տեր Հիսուսին և վստահ չեն Նրա իրական լինելու փաստի մեջ, անտեղյակ են խաչի վրա Նրա մեծ զոհի էությանը և չեն էլ պատկերացնում, թե Աստված ինչպիսի արձագանք է իրենցից ակնկալում: Ճիշտ այն մարդու պես, ով Իսահակին առաջարկեց իր հետ գնալ եկեղեցի և վկայեց Նրան Աստծո Խոսքը, դու էլ քաջաբար առաջ ընթացի՛ր՝ որպես Երկնքի Արքայության դեսպան, և տարածի՛ր Քրիստոսի Բարի Լուրը:

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։