Աստված առատաձեռնորեն է բաշխում Իր բարի և կատարյալ պարգևները ?

Հիմնականում, մենք հատուկ առիթների դեպքում ենք մարդկանց նվեր տալիս կամ նվեր ստանում նրանցից։ Ի տարբերություն մեզ, Աստված չի սպասում որևէ հատուկ առիթի, որպեսզի մեզ նվեր անի։ Հավատում եմ, որ Աստված դա անում է, որովհետեւ պարզապես սիրում է մեզ։ Եվ Նա միշտ է մեզ սիրում։ 

Աստվածաշնչում կարդում ենք. «․․․ամեն բարի շնորհ և ամեն կատարյալ պարգև վերևից է՝ իջած լույսի Հորից, որի մեջ փոփոխում կամ փոփոխման ստվեր բնավ չկա» (‭‭Հակոբոս‬ ‭1.17):‬ ‭

Սիրելի բարեկամ, քո երկնային Հայրը շատ բարիքներ ունի քեզ համար։ Իրականում, Նա լավագույնն է պատրաստել քեզ համար։ Ոչինչ չի կարող համեմատվել այն ամենի հետ, ինչը Նա պահում է քեզ համար. 

• Իր խաղաղությունը, Իր ուրախությունը, Իր կյանքը, Իր կամքը։
• Այն ունակություններն ու գործելու ազատությունը, որոնք անհրաժեշտ են Երկրի վրա քեզ վստահված առաքելությունն ավարտին հասցնելու համար։
• Նույնիսկ ամենադժվար ժամանակներում քո շրջապատի մեջ լույս լինելու զորությունը։ 

Եվ ի հավելումն այս ամենի, Աստված մեր հանդեպ Իր անսահման սիրուց դրդված տվեց Իր Որդուն՝ Իր ամենաշռայլ  նվերը. «Աստված այնքան սիրեց աշխարհը, որ Իր միածին Որդուն տվեց, որպեսզի ով նրան հավատում է, չկորչի, այլ հավիտենական կյանք ունենա» (‭‭Հովհաննես‬ ‭3.16‬):

Աստծո համար թանկ ու սիրելի զավակ, ինչպես Տերն է տվել է քեզ Իր լավագույն նվերները, այնպես էլ դու կարող ես մյուսներին փոխանցել Աստծո սերը։ Դու օրհնվել ես մյուսների համար օրհնություն դառնալու նպատակով։ Մեծ ազատություն կա մյուսների համար օրհնություն լինելու մեջ։ Մեծ ուրախություն է գալիս, երբ մենք բաշխում ենք ճիշտ այնպես, ինչպես Երկնային Հայրն է բաշխել։

Ինչպես Աստվածաշնչում է գրված. «Ամեն բան ձեզ ցույց տվեցի, որ այսպես պետք է աշխատել և հոգ տանել տկարներին ու Տեր Հիսուսի խոսքը հիշել, որ ասաց. “Ավելի երանելի է տալը, քան առնելը» (‭‭Գործք Առաքելոց‬ ‭20.35‬):

Առաջարկում եմ միասին աղոթել․ «Շնորհակալություն, իմ բարի և ողորմած Տե՛ր։ Դու ինձ ամեն բան ես տվել՝ լավագույնը լավագույնների մեջ։ Շնորհակալ եմ, որ իմ հանդեպ Քո սիրուց դրդված Որդուդ ես ուղարկել աշխարհ։ Շնորհակալ եմ Քո տված խաղաղության համար, Քո պարգևած ուրախության, զորության ու կյանքի համար։ Այսօր աղոթում եմ, որ ինձ օգնես Քեզ նմանվելու հարցում… Ուզում եմ նմանվել Քեզ նաև առատաձեռնորեն այս աշխարհին բարիք անելու հարցում, որին Դու այդքա՜ն շատ ես սիրում։ Շնորհակալություն, որ տալու մեջ Դու ուրախություն և ազատություն ես դրել։ Աղոթում եմ Տեր Հիսուսին անունով։ Ամեն»։ 

Շնորհակալ եմ, որ դու կա՛ս։