Բացարձակ ու կատարյալ խոնարհությունը

Սիրելի՛ բարեկամ, հավանաբար ծանոթ ես Զաքեոսի պատմությանը։ Նրան բոլորն էին ատում, քանի որ նա, լինելով հրեա, հռոմեական իշխանության հարկահավաքներից մեկն էր և ոչ միայն հարկեր էր հավաքում իր հայրենակիցներից, այլև գողանում նրանցից, զրկում իր եղբայրներին ու հարստանում նրանց հարստահարելու հաշվին։ 

Ե՛կ տեսնենք, թե ինչ է ասում Տեր Հիսուսը, երբ առաջին անգամ հանդիպում է նրան. «Երբ այդ տեղը եկավ, Հիսուսը վեր նայեց ու նրան ասաց. «Զաքեո՛ս, շտապի՛ր, իջի՛ր, որովհետև այսօր պետք է քո տանը մնամ» (Ղուկաս 19:5)։

Այս առաջարկը անհավատալիորեն զարմանահրաշ մի բան էր, քանի որ այն բացահայտում է Հոր սիրո մեծությունը ոչ միայն Զաքեոսի, այլև մեզնից յուրաքանչյուրի հանդեպ: Աստված Իր զարմանալի սիրո մղումով Երկնքից նայեց մարդկությանը և ուղարկեց Իր միածին Որդուն, որպեսզի մեզ փրկի ու Իր համար ժողովուրդ դարձնի:

Այնուամենայնիվ, այն փափագը, որն Աստված ունի մարդկության հանդեպ, բոլորովին այլ հարթություն է բաց անում մեզ համար, երբ մենք ականատես ենք լինում Տեր Հիսուսի՝ Աստծո Որդու վերաբերմունքին ու խոսքերին՝ ուղղված բոլորից ատելի Զաքեոսին:

Այն, որ Աստված Երկնքից հոգ է տանում մեզ համար, արդեն իսկ սիրո մեծագույն դրսևորում է։ Սակայն այն, որ Տեր Հիսուսը խոնարհեցրեց Իրեն այնքան, որ Իր ուշադրությունը կենտրոնացրեց Զաքեոսի նման մերժված ու ատելի մեկի վրա, իսկապես երկնային ողորմություն էր։

Երբեմն ես և դու նույնպես բարձրանում ենք մեր հպարտության ծառը։ Մենք բնակվում ենք այդտեղ՝ բազմած մեր ձեռքբերումների ու նվաճումների գահին (որոնց երբեմն արդար ուղիներով չենք հասել, ինչպես Զաքեոսի պարագայում էր):

Այնուամենայնիվ, Տեր Հիսուսը, Ով սիրում է մեզ անսահման մեծ սիրով, չի ամաչում Իր հայացքը բարձրացնել դեպի մեզ և ամենախորը գորովանքով ասել. «Շտապի՛ր և իջի՛ր, քանի որ այսօր Ես պետք է քո տուն գամ»:

Տեր Հիսուսը դեպի մեզ Իր առաջին քայլը կատարում է՝ կանչելով մեզ: Սակայն Նրա հետ մտերմության երկրորդ քայլը հե՛նց մենք պետք է անենք՝ իջնելով մեր հպարտության ծառից և թույլ տալով, որ Տերը գա մեզ մոտ և մնա մեր մեջ:

Աստծո համար թանկ ու սիրելի՛ զավակ, կուզե՞ս աղոթել ինձ հետ միասին այս աղոթքով և հրավիրել Տեր Հիսուսին քո կյանք, եթե մինչ օրս դեռ չես արել այդ․ «Տե՛ր, շնորհակալ եմ Քո անսահման սիրո համար: Ես այսօր բացում եմ իմ սրտի և կյանքի դուռը Քո առջև: Խնդրում եմ՝ օգնիր ինձ ապրելու այնպիսի կյանքով, որը հաճելի կլինի Քեզ և կուրախացնի Քո սիրտը։ Ես իմ ողջ էությամբ փափագում եմ Քեզ հետ անձնական հարաբերություններ ունենալ։ Շնորհակալ եմ, Տե՛ր Հիսուս, որ այսօր Քո խոնարհությամբ հպվեցիր ինձ։ Աղոթում եմ Քո սուրբ և պատվական անունով։ Ամե՛ն»:

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։