Աստված ազատել է քեզ մահից ու անեծքից

Մենք մոտենում ենք «Աստծու բարությունը մեղրից էլ քաղցր է» անվանումը կրող ուղերձների շարքի ավարտին։ Նախորդ ուղերձի մեջ մենք տեսանք, որ ըստ Աստվածաշնչի` մարդու մեծագույն կարիքը Տեր Աստծու հետ հաշտությունը և Նրա հետ հարաբերության խոչընդոտը՝ մեղքի ու անիրավության պատնեշը վերացնելն է։ Մարդը չի կարող երջանիկ լինել, եթե չի բավարարվել նրա հոգու այս մեծագույն կարիքը։

Սիրելի՛ բարեկամ, գիտե՞ս արդյոք, որ քո հոգին տեսնում է հոգևոր իրականությունը, որը հասու չէ քո ֆիզիկական զգայարաններին։ Մարդու հոգին տեսնում է այն, ինչը չեն կարող տեսնել նրա աչքերը։ Մարդու հոգին գիտի այն, ինչը չի կարող ընկալել նրա միտքն ու տրամաբանությունը։ 

Պողոս առաքյալը խոսում է այս մասին, երբ բացատրում է Սուրբ Հոգու օտար լեզուների պարգևի գործածությունը հավատացյալի կյանքում․ «Որովհետև լեզուներով խոսողը մարդկանց հետ չի խոսում, այլ Աստծու, քանի որ ոչ ոք չի հասկանում. նա Հոգով ներշնչված է խորհուրդներ հայտնում։ Քանի որ եթե ես օտար լեզվով եմ աղոթում, իմ հոգին է աղոթում, բայց միտքս անպտուղ է մնում» (Ա Կորնթացիս 14․2,14):

Մի պահ փորձիր պատկերացնել, թե ինչ ապրումներ ունի այն մարդու հոգին, որն ապրում է այնպիսի մի կյանքով, որը տվյալ մարդուն տանում է դեպի դժոխքի տանջանքները և հավիտենական չարչարանքների իրողությունը կրակե լճի մեջ։ Մարդու միտքը կարող է խաբվել զանազան փիլիսոփայություններով ու կրոններով, սակայն հոգին գիտի ճշմարտությունը։ 

Ինչպե՞ս կարող է նման մարդն ապրել իր կյանքը երջանկության զգացումով։ Անհնարի՛ն է։ Նրա կյանքում միշտ մի բան պակաս է լինելու։ Նա կարող է ամեն բան ունենալ և վայելել այս աշխարհի բարիքները, սակայն ներսում միշտ մի անբավարարվածության ու դատարկության զգացողություն է լինելու, քանի որ նրա հոգին անխաղաղ է․․․, քանի որ նման կյանքը Աստծու արդար բարկությունն է բերելու նրա կյանքի մեջ։ Իսկ ո՞րն է ելքը․․․

Աստծու համար թանկ ու սիրելի՛ զավակ, բարի Աստված ամեն բան հոգացել է, որպեսզի մեզ ազատի մահից ու անեծքից։ Աստված մեծ գին է վճարել՝ Իր ամենաթանկը՝ Իր Միածին Որդուն զոհելով Գողգոթայի խաչի վրա` որպես մեր մեղքերի հատուցում ու փրկագին։ Բարի Աստված ոչի՛նչ չի խնայել, որպեսզի մեզ՝ Իր թանկ ու սիրելի զավակներին ազատի հավիտենական տանջանքի հեռանկարից և այս կյանքի ընթացքում մեր վրայից մաքրի մեղքի ու անեծքի բոլոր հետևանքները։ 

«Աստված այնքան սիրեց աշխարհը, որ Իր միածին Որդուն տվեց, որպեսզի ով Նրան հավատում է, չկորչի, այլ հավիտենական կյանք ունենա։ Որովհետև Աստված Իր Որդուն աշխարհ չուղարկեց՝ դատելու աշխարհը, այլ որպեսզի Նրա միջոցով աշխարհը փրկվի։ Ով Նրան հավատում է, չպիտի դատապարտվի, իսկ ով Նրան չի հավատում, արդեն դատապարտված է, որովհետև չհավատաց Աստծու միածին Որդու անվանը։ Եվ ահա այս է դատաստանը. լույսը եկավ աշխարհ, սակայն մարդիկ խավարը լույսից ավելի սիրեցին, որովհետև իրենց գործերը չար էին։ Որովհետև յուրաքանչյուր ոք, ով չարիք է գործում, ատում է լույսը ու չի գալիս դեպի լույսը, որպեսզի իր գործերը հայտնի չդառնան։ Իսկ ով կատարում է այն, ինչ ճշմարիտ է, գալիս է դեպի լույսը, որպեսզի հայտնի դառնա, թե իր գործերը Աստծով են կատարվել» (Հովհաննես 3․16-21)։

Քո հոգին կցնծա ներսումդ, եթե կանգնես փրկության ճանապարհի վրա։ Քո հոգին կվայելի Աստծու Արքայության մի մասնիկը լինելը, և քո երջանկությունը արդեն բացարձակապես կախված չի լինի նրանից, թե ինչ ունես կամ չունես մյուս մարդկանց հետ համեմատ։ Դու կունենաս ամենակարևորը՝ Տեր Հիսուս Քրիստոսին, Ով քո մեջ է բնակվում։

«Ով Աստծու Որդուն հավատում է, ինքն իր մեջ այս վկայությունն ունի, ով Աստծուն չի հավատում, նրան սուտ է հանում, որովհետև չհավատաց այն վկայությանը, որ Աստված վկայեց Իր Որդու մասին։ Եվ սա է վկայությունը, որ Աստված մեզ հավիտենական կյանք տվեց, և այս կյանքը Նրա Որդու մեջ է։ Ով Որդուն ունի, նա կյանք ունի, և ով Աստծու Որդուն չունի, կյանք չունի» (Ա Հովհաննես 5․10-12):

Աստծու բարությունը մեղրից էլ քաղցր է։ Նա հոգացել է, որ դու ազատ լինես մեղքից, մահից, անեծքից և հավիտենական տանջանքի անհուսության հեռանկարից։ Ընդամենը հավատա՛ Տեր Հիսուս Քրիստոսին և ապաշխարի՛ր Նրա կամքին հակառակ քո ընթացքից ու պատկերացումներից։ Աստծու բարությունը մեղրից էլ քաղցր է․․․

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։