Աստծու բարությունը մեղրից էլ քաղցր է

Այս ուղերձով մենք ավարտում ենք շարքը, որը կրում էր «Աստծու բարությունը մեղրից էլ քաղցր է» անվանումը։ Ինչպես արդեն տեսել ենք այս շարքի մեր նախորդ ուղերձների մեջ` Աստծու հետ հաշտությունը սկսվում է խորը ապաշխարությամբ, և Նրա հետ մտերմությունը հարատև է դառնում Տիրոջ կամքին հնազանդությամբ։ 

Սիրելի՛ բարեկամ, պատահական չէ, որ Տեր Աստծու բարության մասին ուղերձների այս շարքի համար ընտրել եմ «Աստծու բարությունը մեղրից էլ քաղցր է» անվանումը։ Իրապես, Աստվածաշունչն է սովորեցնում, որ Տեր Աստծու հետ մարդու մտերմության հարաբերությունը քաղցր ու անուշ մի բան է։ 

«Ճաշակեցե՛ք և տեսե՛ք, որ Տերը քաղցր է. երանելի է այն մարդը, որ ապավինել է Նրան» (Սաղմոս 34․8):

Վերը բերված աստվածաշնչյան խոսքի մեջ «ճաշակել» բառը փոխաբերական իմաստով նկարագրում է Աստծու հետ մտերմությունը։ Աստված փափագում է ինձ և քեզ հետ մտերիմ հարաբերության, որը, ինչպես արդեն ասացի, սկսում է ապաշխարությամբ և հարատև դառնում Նրա կամքին հնազանդությամբ։ 

«Արդ դեն գցելով ամեն չարություն, նենգություն, կեղծավորություն, նախանձ և ամեն չարախոսություն՝ նորածին մանուկների պես փափագե՛ք բանական, անխարդախ կաթը, որպեսզի նրանով աճեք փրկության համար, քանի որ ճաշակել եք, որ քաղցր է Տերը» (Ա Պետրոս 2․1-3):

Աստծու համար թանկ ու սիրելի՛ զավակ, ցավոք, շատ շատերն այդպես էլ չեն ճաշակում Տեր Աստծու բարությունն իրենց կյանքերում, քանի որ, թեև հավատում են Աստծուն, Նրան պատկերացնում են որպես մի ինչ-որ հեռու տեղում Իր գահին բազմած Աստծու, Ով այնքան էլ հետաքրքրված չէ իրենց խնդիրներով։ Շատերը կարծում են անգամ, որ իրենք մոռացված են Աստծու կողմից, և ապրում են անհուսության ու անխաղաղության հոգեվիճակի մեջ։ 

«Դուք Իմ բարեկամներն եք, եթե անեք այն, ինչ Ես պատվիրում եմ ձեզ։ Ձեզ այլևս ծառաներ չեմ կոչում, որովհետև ծառան չգիտի, թե իր տերն ի՛նչ է անում։ Ձեզ բարեկամներ եմ կոչում, որովհետև այն ամենը, ինչ Իմ Հորից լսեցի, ձեզ հայտնեցի» (Հովհաննես 15․14-15):

Տեր Հիսուսին հավատացող մարդիկ առաջին հերթին պետք է հավատան Նրա խոսքերին։ «Դուք Իմ բարեկամներն եք, եթե անեք այն, ինչ Ես պատվիրում եմ ձեզ»։ Մեր հնազանդությունը Տեր Հիսուսի պատվիրաններին՝ Նրա ակնկալած կյանքով այս երկրի վրա ապրելը մեզ կդարձնի Նրա բարեկամները։ Այդ ժամանակ մեր մտերմության մեջ մենք կճաշակենք Նրա քաղցրությունը և մեր կյանքերում բազում վկայություններ կունենանք, թե ինչպիսի զորավոր գործեր ու հրաշքներ է գործել Նրա բարությունը։ 

Իրապե՛ս, բարի Աստված հաճույք է ստանում, երբ Իր զավակները երջանիկ են և ապահով։ Իրապե՛ս, բարի Աստված ամեն բան հոգացել է, որպեսզի մեզ ազատի մահից ու անեծքից։ Իրապե՛ս, այսօր բարի Աստված Իր մտերմության ձեռքն է մեկնում դեպի քեզ և մեծագույն փափագով առաջարկում քեզ դառնալ Իր լավագույն բարեկամը․ «Դուք Իմ բարեկամներն եք, եթե անեք այն, ինչ Ես պատվիրում եմ ձեզ»։

Աստծու բարությունը մեղրից էլ քաղցր է․․․

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։