Սուրբծննդյան տոները հիմնված են տկարության ժամանակների վրա

Սիրելի՛ բարեկամ, այսօր այս տարվա վերջին օրն է։ Զարդարված տոնածառեր ու ցուցափեղկեր, տոնական լույսեր, նվերներ, համեղ ուտելիքների ախորժելի բույր, ընտանիքի հետ ուրախ ժամանցի սպասում․․․ Մեզնից շատերի համար գալիք Նոր Տարին և Սուրբ Ծնունդը նույնպես ուրախության ժամանակ է։ Ժամանակ, երբ մենք կարծես լիցքավորվում ենք դրական լիցքերով։  

Մինչդեռ առաջին Սուրբ Ծնունդը այնքան էլ հանգիստ ու խաղաղ օր չէր, առավել ևս՝ տոնական։ Իրականում այն մեծ նեղությունների օր էր։ Մի պահ պատկերացրու՝ հռոմեական իշխանությունների կողմից պարտադրված մարդահամար, մենավոր մի գյուղ  քարքարոտ տեղանքում, գարշահոտ մի գոմ, երկար ճանապարհից հոգնած և ուժասպառ երիտասարդ կին, և մի կողմից էլ՝ մի քանի հովիվներ, և այնտեղ չկար թագավորների Թագավորին ողջունելու պատրաստ որևէ շքախումբ․․․ 

Ես սիրում եմ այն սուրբծննդյան երգերը, որոնցում նկարագրվում է Տեր Հիսուսի ծննդյան գիշերը, երբ մեծագույն հրաշքը կատարվեց ծանրագույն նեղությունների մեջ․․․

Իսկ ծանո՞թ ես սուրբծննդյան այս հրաշալի երգի բառերին․

«Փոքրիկ քաղաք Բեթղեհեմի,
Որքա՜ն լուռ ես, խաղաղ․․․
Ննջես դու խոր, մինչ քո վերև
Հսկեն աստղերն չքնաղ։

Փողոցներուդ մեջ մթին
Փայլի սուրբ լույսն անշեջ,
Երկյուղ ու հույս բոլոր դարոց,
Այս լուռ գիշերին մեջ»։

Բեթղեհեմը զարգացած և եռուզեռով լի քաղաք չէր։ Այս փոքրիկ բնակավայրը ո՛չ առևտրային խոշոր կենտրոն էր, ո՛չ մշակութային մայրաքաղաք, ո՛չ էլ նույնիսկ զբոսաշրջության հայտնի վայր։ Աննշան մի բնակավայր էր, հեռավոր մի գյուղ։ 

Իսկ գիտե՞ս, որ Տեր Աստված հաճախ է աննշան բաներն օգտագործում Իր փառքի համար։ Նա երբեմն հայտնում է Իրեն այնպիսի վայրերում, որտեղ ոչ ոք չկա, այնպիսի մարդկանց միջոցով, որոնք հայտնի չեն և որոնց չեն ծափահարում մարդկանց բազմությունները։ 

«Բայց Աստված ընտրեց նրանց, որոնց այս աշխարհում հիմարներ են կարծում, որպեսզի իմաստուններին ամաչեցնի, իսկ աշխարհի տկարներին Աստված ընտրեց, որպեսզի հզորներին ամաչեցնի» (Ա Կորնթացիս 1․27)։

Աստծո համար թանկ ու սիրելի զավա՛կ, գուցե դո՞ւ էլ քեզ տկար ու աննշան մեկն ես համարում՝ հոգնած, ուժասպառ, անկարևոր․․․ Մի՛ հուսահատվիր, քո տկարությունը Տեր Աստծուն չի զարմացնում կամ հիասթափեցնում։ Իրականում, հե՛նց այդ տկարությունն է, որ Նա օգտագործելու է քո միջոցով Իրեն փառավորելու համար։ 

Սուրբ Ծնունդը մեր տկարությունների մեջ Նրա ցնծության տոնն է․․․

Սուրբ Ծնունդը Տեր Աստծո մարդանալու, խոցելի և մահկանացու մարդ դառնալու տոնն է։

Սուրբ Ծնունդը Տեր Հիսուսի՝ մեր տկարությունների մեջ մեզ զորացնելու տոնն է։ 

Սուրբ Ծնունդը Խաղաղության Իշխանի՝ մեզ ապրելու օրինակ դառնալու տոնն է։ Չէ՞ որ Աստծո զորությունը դրսևորվում է մեր տկարությունների մեջ։ 

«Քո հրաշքն՝ ամեն օր»-ի ողջ անձնակազմի կողմից և Էջմիածնի Էմմանուել ավետարանական եկեղեցու բոլոր հավատացյալների անունից ընդունի՛ր մեր օրհնանքները 2022 թվականի համար և հիշի՛ր, որ մենք աղոթում ենք քեզ համար։

Հուսով եմ, որ նաև վաղը սկսվող տարվա մեջ թույլ կտաս, որ ամեն Աստծո օր ծառայենք քեզ մեր ամենօրյա քաջալերական ուղերձներով և քեզ հետ լինենք մեր օրհնանքների ու աղոթքների շնորհիվ։

Հ.Գ․ Երգը, որի բառերից օգտվեցի այսօրվա ուղերձի մեջ, կարող եք լսել հետևյալ հղման միջոցով՝ https://youtu.be/qJVvgbmvZ0k

Շնորհակալ եմ, որ դու կա՛ս։