Սերը չար բան չի մտածում…

Այսօր կրկին ուզում եմ քեզ հորդորել, որ հատուկ ուշադրություն դարձնես և հոգ տանես քո սրտի համար։ Երբեմն մի փոքր վիրավորանքը, արհամարհական կամ խայթող հայացքը կամ էլ պատահականորեն սխալ ասված խոսքը բավարար են լինում, որ մարդու հոգին լցվի դառնությամբ, իսկ սիրտը՝ ծանրանա։ 

Սիրելի՛ բարեկամ, այսպիսով, այսօր ընդունի՛ր այս քաջալերանքը․ «Երբ որևէ մեկը քո հանդեպ իրեն սխալ է պահում և վիրավորում կամ վնաս հասցնում քեզ ու քո անվանը, հիշի՛ր, որ դու ինքդ անսխալական չես և բազմաթիվ անգամ Տեր Աստծուց ներում ես ստացել Իր հանդեպ քո սխալ վերաբերմունքի և գործած մեղքերի համար»։

Պատկերացրու, օրինակ, որ մի առավոտ աշխատավայրում քո գործընկերներից մեկը քո բարևը չի լսում, քեզ չի նկատում և չի բարևում։ Ողջ օրվա ընթացքում դու մտածում ես, թե ինչ ես արել նրան, որ արժանացել ես նման արհամարհական վերաբերմունքի։ Հազարավոր հարցեր են անցնում մտքովդ, և բոլոր այդ անպատասխան հարցերը օրվա վերջում վրդովմունք են առաջացնում քո սրտում։

Մի քանի օր անց դու տեղեկանում ես, որ տվյալ անձնավորությունը ընտանեկան բարդ իրավիճակի մեջ է… Եվ հանկարծ հասկանում ես, որ դու սխալ ես ընկալել նրա անտարբերությունը քո հանդեպ։

Աստվածաշնչում կարդում ենք հետևյալ խոսքերը. «(Սերը) Անամոթություն չի անում, սեփական շահը չի փնտրում, բարկությամբ չի գրգռվում, չար բան չի մտածում» (‭‭Ա Կորնթացիս‬ ‭13․5)։

Սե՛ր ունեցիր մյուսների հանդեպ։ Եղի՛ր ներողամիտ և չարությամբ մի՛ լցվիր։ Այո՛, մարդիկ կարող են չար լինել, և նրանց չարությունը կարող է մեզ ցավեցնել ու մեծ վնասներ հասցնել։ Սակայն մենք պետք է գիտակցենք, որ անգամ նրանց չարանալը կարող է պատճառներ ունենալ։ Մեր հանդեպ չարությամբ լցված մարդիկ ավելի շատ մեր կարեկցանքի, ներման և աղոթքների կարիքն ունեն, քանի որ իրենք իրենց շղթայել են չարության և ատելության կապանքներով։

Թույլ մի՛ տուր, որ մարդիկ սրտիդ վերքեր հասցնեն և իշխեն քո մտքերին ու զգացմունքներին։ Քո սրտի համար լավագույն պաշտպանությունը ներելն ու ներողամտություն ցուցաբերելն է, ինչպես նաև քեզ ցավեցնողների համար կարեկցանքն ու աղոթքներն են։ Եթե նման մոտեցում ունենաս, կպաշտպանես քո սիրտն ամեն տեսակի դառնությունից, ճնշվածությունից ու ծանրությունից։

Աստծո համար թանկ ու սիրելի՛ զավակ, հավատա՝ Աստված քո կյանքում և քո սրտի համար լավագույնն է կամենում…

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։