Հասել ես քարքարոտ ճանապարհի՞

Սիրելի՛ բարեկամ, քրիստոնյայի կյանքը հաճախ համեմատում են մի ճանապարհի հետ, որով մենք անցնում ենք այնքան ժամանակ, մինչև հասնենք վերջնական նպատակակետին՝ Երկինք, որտեղ Տերն է սպասում Իրեն հավատացող և Իր կամքը սիրող մարդկանց: Այդ ճանապարհը, որով անցնում ենք, երբեմն բոլոր այլ ճանապարհներից ամենաքաղցրն ու ամենահաճելին է մեզ համար։ Բայց լինում են իրավիճակներ, երբ մեր գլխավերևում սև ու մութ ամպեր են հավաքվում, և ճանապարհը դառնում է վտանգավոր ու դժվար։

Ահա այն խոստումը, որ Աստված այսօր տալիս է քեզ. «Եվ Նրան, որ կարող է անարատ պահել ձեզ․․․» (Հուդա 1:24):

Այո՛, Տեր Հիսուսը կարող է քեզ պահել փրկության միակ ճանապարհի վրա սայթաքելուց, որը երբեմն դառնում է քարքարոտ և վտանգավոր։ Արդյոք նման ընթացքո՞վ է անցնում նաև քո քրիստոնեական ուղին։ Բախվել ես դժվարությունների՞։ Անելանելի իրավիճակո՞ւմ ես։ Քո հանդեպ որոշ մարդկանց թշնամանքը խանգարում է քեզ քո հանգիստ ու խաղաղ քրիստոնեական ընթացքի մեջ և մղում է սայթաքելո՞ւ։ Ուսերիդ բեռնե՞րն են ծանրացել։

Աստծո համար թանկ ու սիրելի՛ զավակ, միշտ հիշի՛ր, որ Տեր Հիսուսը՝ քո Փրկիչը, քայլում է քո կողքով և ամուր բռնել է ձեռքիցդ, որ չսայթաքես։ Նա արդարության Արեգակն է՝ Լույսը, որ զորացնում և պաշտպանում է քեզ։ Դու շուտով կտեսնես, թե ինչպես է Արեգակը կրկին փայլում ու լուսավորում ճանապարհդ։ Քաջացի՛ր և զորացիր։ Մնա՛ ամուր և սպասի՛ր Տիրոջ օգնությանը։ 

Կուզե՞ս միասին շնորհակալություն հայտնենք Տեր Հիսուսին: Ե՛կ աղոթենք այս աղոթքով․ «Տե՛ր, ինչպե՞ս շնորհակալություն հայտնեմ Քեզ Քո արած բոլոր բարիքների և օգնությունների համար։ Խոսքերս տկար են և անկարող՝ փոխանցելու այն ամենը, ինչ ունեմ իմ սրտում Քո հանդեպ։ Շնորհակալ եմ, որ ամեն օր ամուր բռնում ես ձեռքս և պահում ես ինձ սայթաքելուց: Շնորհակալ եմ Քո Հոգու համար, Ով ուղղորդում է, ուսուցանում և օգնում է ինձ, որպեսզի ամեն օր իմ գործերով ավելի ու ավելի նմանվեմ Քեզ։ Թո՛ղ օրհնյալ լինի Քո սուրբ ու պատվական անունը, իմ Տե՛ր, իմ Հիսո՛ւս, իմ Փրկի՛չ: Աղոթում եմ Քո սքանչելի ու պատվական անունով։ Ամե՛ն»:

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։