Ի՞նչն է գողանում քո էներգիան։

Սիրելի բարեկամ, եթե ճամփորդել եք Հայաստանի հյուսիսային շրջաններով կամ ապրում եք եվրոպական որևէ երկրում, ապա նկատած կլինեք, որ որոշ ծառերի վրա ասես կանաչ փնջեր աճած լինեն։ Անգամ երբ աշնանը ծառերը դեղնում են և մոտենում տերևաթափին, այդ փնջերը շարունակում են մնալ կանաչ։ Դրանք շատ գեղեցիկ են, սակայն պետք է իմանալ նաև, որ դրանք մակաբույծ բուսեր են և դանդաղ կերպով սպանում ենք ծառերին։ Այդ կանաչ փնջերը իրենց արմատները տարածում են ծառերի ճյուղերի մեջ, քաշում դրանցից հյութը, այսպիսով, նաև դրանց ողջ էներգիան։ Նման մակաբույծերով հիվանդացած ծառը ժամանակի ընթացքում ավելի ու ավելի է թուլանում և, ի վերջո, կարող է նաև չորանալ։ 

Մեր կյանքերին նույնպես կարող են այնպիսի մակաբույծներ կպչել, որոնք գողանում են մեր ողջ էներգիան՝ մեր ուժերն ու խանդավառությունը։ 
Օրինակ, դա կարող է լինել, որևէ ճնշող իրավիճակ, փորձություն, անցյալի որևէ սուգ կամ ցավ որից չենք կարողանում մխիթարվել ու ազատվել, ներելու հետ կապված խնդիրներ, հիվանդության խորացում, մեղք, վախեր, տագնապներ ու տարբեր անհանգստություններ։ Այս ամենի մեջ Աստված հատուկ քեզ խոսք ունի քեզ համար. 

«…հանդարտությամբ և վստահելով կլինի քո զորությունը» (Եսայիա‬ ‭30․15‬)։ 

Դա հնարավոր է…։ Այո՛, հնարավոր է գերբնական խաղաղությամբ անցնել այդ բոլոր արհավիրքների միջով։ 

Անշուշտ, կարևոր է հասկանալ, թե ինչպես է հնարավոր դա անել։ Ինչպե՞ս է հնարավոր խաղաղ մնալ երբ լսում ես, որ լուրջ հիվանդություն ունես։ Ինչպե՞ս կարող ես խաղաղ լինել, երբ չգիտես, թե ինչպես ես հաջորդ շաբաթ կերակրելու երեխաներիդ։ Ինչպե՞ս խաղաղ մնալ, երբ լրջագույն անձնական խնդրի ես բախվել։ 

Միայն Աստված կարող է տալ քեզ այդ անըմբռնելի խաղաղությունը։ Եվ բարի լուրը նրանում է, որ Նա ցանկանում է դա անել։ 

Ամենակարևոր քայլը բացասական մտքերը մերժելու որոշում կայացնելն է։ Դրա փախարեն որոշի՛ր ընդունել հավատքդ ամրացնող խոսքեր։ Անշուշտ, դու արդեն իսկ դա անում ես՝ ընթերցելով «Քո հրաշքն ամեն օր» գրառումները, բայց կարող ես նաև Աստծուն փառաբանող երգեր լսել և խորհել ու մտորել Աստվածաշնչում տեղ գտած խոստումների շուրջ։ 

Աստծո համար թանկ ու սիրելի զավակ, ինչպիսին էլ լինի քո իրավիճակը՝ այսօր ընդունի՛ր Աստծո գերբնական խաղաղությունը։ Վստահի՛ր Նրան։ Ավելի մոտեցի՛ր Նրան, որպեսզի կարողանաս լսել Նրա մեղմ ձայնը, որը կարող է քեզ հանգստացնել և մխիթարել։ Քո վստահությունը թող Աստված լինի։ Թույլ մի տուր, որ մակաբույծ մտքերը գողանան քո էներգիան, այլ սնվիր Աստծո Խոսքով և ընդունի՛ր Նրա հավատք սնուցող քաջալերանքները։

Այսօրվա ուղերձն ուզում եմ ավարտել՝ հրավիրելով քեզ լսել մեր եկեղեցու հրատարակած ձայներիզի երգերից մեկը, որը կրում է «Դու իմ ամենն ես» վերնագիրը։ Փորձիր երգել այն և երգի բառերն արտասանել որպես աղոթք։ Ահա երգի հղումը՝

Շնորհակալ եմ, որ դու կա՛ս։