Թույլ չտա՛ս, որ վախը կառավարի քեզ

Սիրելի բարեկամ, այսօր և գալիք մի քանի օրերի ընթացքում ուզում եմ միասին խոսենք վախի մասին։ Վախը շատ վատ խորհրդատու է։ Վախը կարող է վերածվել տագնապի և կաթվածահար անել մեզ։ Իսկ Աստված կամենում է, որ դու հաղթահարես քո բոլոր վախերը։ «Մի՛ վախեցիր»,- ասում է Տեր Հիսուսը…

Ի՞նչ է վախն իրականում։ Այն կարող է սահմանվել որպես «տագնապի մի զգացում, որն առաջացել է իրական կամ մտացածին վտանգի արդյունքում»։ 

Իմ հարցը հետեւյալն է. «Ի՞նչ է կատարվում, երբ քո կյանքում վախը գլուխ է բարձրացնում։ Երբ վախի զգացումը, վատ կանխազգացումը կամ տագնապն այնքան զորեղ է դառնում, որ այն խանգարում է քեզ լինել նորմալ»։ Ահա երեք բան, որ վախի հետևանքներն են. 

• Վախը կաթվածահար է անում։ 
• Վախը սնուցում է կասկածներին ։
• Վախը քո մեջ սպանում է Աստծո ծրագրերը, որոնք Նա ունի քե՛զ համար։ 

Վախը հավատքի թշնամու ամենաշատ կիրառվող զենքերից մեկն է, որի նպատակն է քեզ քո հոգևոր ընթացքի մեջ ճնշելն ու խանգարելը։ Սակայն մի զորեղ ճշմարտություն կա, որ պետք է իմանաս՝ Տեր Հիսուսը հաղթե՛լ է այդ թշնամուն (տե՛ս Կողոսացիս 2․15)։ 

Աստծո համար թանկ ու սիրելի զավակ, Աստվածաշնչում գրված է, որ քեզ տրված է զորության հոգի, սիրո և ողջամտության, այլ ոչ թե երկչոտության, վախի ու կասկածի (տե՛ս ‭‭Բ Տիմոթեոս‬ ‭1․7‬)։ 

Զորության, սիրո և առողջ մտքի այս հոգին Աստծո պարգևն է քեզ։Այն քեզ տվել է Ինքն Աստվա՛ծ․․․ ոչ թե աստվածային ինչ-որ անուղղակի միջամտությամբ, այլ ուղղակիորեն արարիչ Աստծո կողմից՝ Նրա կողմից, Ով շուտով վերադառնալու է որպես Հաղթող Տեր։ 

Անկասկած, վախի դեմ միակ արդյունավետ դեղամիջոցը Աստծո կատարյալ սերն է, որը հաղթում ու հեռացնում է ամեն վախ ու տագնապ մարդու սրտից։ Տիրոջ սերը քո հանդեպ արմատախիլ է անում քո ներսում առկա վախերի բոլոր դրսևորումները։ Հավատքով ամուր բռնի՛ր և դավանի՛ր այն աստվածային ճշմարտությունը, որը գրված է Ա Հովհաննես 4.18 խոսքում. «Սիրո մեջ վախ չկա. կատարյալ սերը հեռացնում է վախը, որովհետև վախի մեջ տանջանք կա։ Եվ ով վախենում է, սիրո մեջ կատարյալ չէ»։

Խնդրում եմ քեզ՝ այսօր ընդունիր այս խոսքերը քո սրտի մեջ։ Աստծո Խոսքը սնում է մեր հավատքը։ Աստծո Հոգին քաջալերում և ուղղորդում է մեզ։ Նա մեզ կարողություն է շնորհում քանդելու բոլոր պատնեշները և ճեղքել բոլոր ահարկու արգելքները։ Աստծո շնորհած զորության շնորհիվ դու զորավոր հաղթանակներ ես ունենալու։ (Տե՛ս Սաղմոս 18.2 և Գ Թագավորաց 22.30 խոսքերը):

Ե՛կ միասին աղոթենք այս խոսքերով. «Տե՛ր, ես դավանում եմ իմ շուրթերով, որ Դու ես իմ Տերը և իմ կյանքի Փրկիչը: Ես դավանում եմ, որ Քո Խոսքը ճշմարտություն է։ Այո՛, Դու ինձ տվել ես զորության, սիրո եւ ողջամտության հոգի: Ես ընդունում եմ Քեզնից այդ հոգին։ Ես հավատում եմ, որ վախերը և դրանց բոլոր հետևանքներն այլևս իշխանություն չունեն ինձ վրա և կորցրել են իրենց զորությունը, քանի որ ես Քեզ եմ պատկանում։ Քոնն է իմ ողջ կյանքը, իմ զգացումները, իմ իրավիճակները, իմ երազանքները և ամեն, ամեն բան։ Ես քոնն եմ, Տե՛ր, և Քո անունն եմ ուզում փառավորել։ Շնորհակալ եմ այն ազատության համար, որ Դու ես ինձ պարգևել՝ ազատագրելով ինձ իմ բոլոր վախերից։ Աղոթում եմ Տեր Հիսուսի անունով։ Ամեն»։ 

Շնորհակալ եմ, որ դու կա՛ս։