Աստված բարի է քո հանդեպ

Սիրելի՛ բարեկամ, տիեզերքի Արարիչ Տերը դաժան ու անկանխատեսելի հայր չէ, ինչպես ոմանք են մտածում: Ընդհակառակը, Աստված, Ով ստեղծել է քեզ, անսահման սիրով սիրում է քեզ, բարի է, հատուկ ծրագիր ունի քո փրկության ու Իր հետ քո մտերմության վերաբերյալ և ոչ մի կերպ մտադրված չէ վնասել քեզ ու բարդացնել քո կյանքը:

Աստվածաշնչում այնքա՜ն շատ խոսքեր կան, որոնք խոսում են մեր հանդեպ Տեր Աստծու բարության, ողորմության և սիրո մասին: Ահա դրանցից մի քանիսը.

«Տե՛ր, Քո ճշմարտությունը մինչև երկինք է հասնում, և Քո հավատարմությունը՝ մինչև ամպերը» (Սաղմոս 36․5):

«Բայց դու, Տե՛ր, մի՛ հեռացրու ինձնից Քո գթությունը. Քո ողորմությունն ու հավատարմությունը թող միշտ պաշտպանեն ինձ» (Սաղմոս 40.11)։

Նրա բարության և սիրո միջոցով դու կարող ես փրկվել և նույնիսկ բժշկություն ընդունել, և դա ոչ թե քո սեփական գործերի շնորհիվ է, այլ՝ Նրա ողորմության (տե´ս Տիտոս 3․5)։

Այսօր քաջալերում եմ քեզ հավատալ ու համոզվածությամբ վստահել Տեր Աստծու բարությանը՝ Նրա, Ով փափագում է անպատմելի հրաշքներ գործել քո կյանքում՝ բժշկել քեզ, ազատել ընկճվածության ծանր բեռից, լցնել քեզ հույսով, վերականգնել քո ընտանիքը, կյանքդ լցնել ուրախությամբ ու իմաստով և նման շատ այլ բարիքներ պարգևել քեզ: Սակայն ամենամեծ պարգևը, որ Տերը ուզում է, որպեսզի ընդունես Իր ձեռքից, դա հավիտենական կյանքն է, որի համար Գողգոթայի խաչի վրա Նա վճարել է Իր ամենաթանկը՝ Իր միածին Որդու կյանքը․․․

Աստվածաշունչն ասում է, որ գողը (սատանան) գալիս է միայն գողանալու, սպանելու և կործանելու համար, իսկ Տեր Հիսուսն եկավ, որպեսզի մենք կյանք ունենանք և լիառատ կերպով ունենանք այն: Այսօր մի կողմ դիր բոլոր կասկածներդ ու սխալ պատկերացումներդ և հավատա, որ Տեր Հիսուսը գործելու է քո կյանքում, և դու  վերականգնելու ես այն ամենն, ինչը թշնամին գողացել է քեզնից։

Աստծո համար թանկ ու սիրելի՛ զավակ, ե՛կ միասին աղոթենք Սաղմոս 85․7 խոսքի համաձայն. «Մեզ ցո՛ւյց տուր Քո ողորմությունը, Տե՛ր, և տո՛ւր մեզ Քո փրկությունը, խնդրում ենք՝ բժշկի՛ր մեզ և միջամտի՛ր մեր կյանքի բարդ իրավիճակներին։ Տեր Հիսուսի անունով ենք աղոթում։ Ամե՛ն»։

Սիրով քեզ հետ կիսվում եմ նաև Աստծո բարության մասին իմ այս պատգամով, որը  «Ճանաչե՛նք Աստվածաշնչի Աստծուն» պատգամների շարքի մաս է կազմում։

Հիշի՛ր, որ դու Աստծո հրաշքն ես, և Աստված սիրում է քեզ։   

Շնորհակալ եմ, որ դու կա՛ս։