Աստծո նպատակը քո կյանքի համար հիասքանչ է

Այսօր ավարտում ենք մեր հերթական շարքը, որը նվիրված էր Տեր Աստծու տված ամենասքանչելի խոստումներից մեկին։ Եվ ուզում եմ, որ այսօր ամրացնենք մեր մեջ Աստծու այդ հրաշալի խոստումը՝ ամեն բան գործում է Աստծուն սիրողների բարիքի համար: Աղոթում եմ, որ այս յոթ օրերի փոխանցած ճշմարտությունները քո սիրտը լցնեն մեր երկնային Հոր բժշկարար սիրով։

Սիրելի՛ բարեկամ, Աստված հստակ նպատակ ունի քո կյանքի համար։ Իսկ թե ի՞նչ է Նա ուզում անել քո կյանքում, կարևորագույն մի հարց է, որը պետք է տաս ինքդ քեզ և նաև՝ Աստծուն։

Ընթերցե՛նք այս շարքի հիմնական աստվածաշնչյան խոսքը. «Բայց գիտենք, որ ամեն ինչ գործակից է լինում նրանց բարիքի համար, ովքեր սիրում են Աստծուն և կանչված են Նրա կամքով» (Հռոմեացիս 8․28)։ 

«Նրա կամքով․․․»։

Տեր Հիսուսը կենդանի հացն է Երկնքից, որին ընդունողները հավիտենական կյանք են ունենալու։ Սակայն հենց Տեր Հիսո՛ւսն էր շեշտում, որ ոչ թե Իրեն Տե՜ր, Տե՜ր ասողները կփրկվեն, այլ նրանք, որ կատարում են երկնային Հոր կամքը (տե՛ս Մատթեոս 7:21 խոսքը)։

Տեր Հիսուսը ինձ և քեզ ցույց է տալիս Աստծու բարեհաճությանն ու օրհնությանն արժանանալու ճանապարհը: Նա մեր օրհնությունների Աղբյուրն է։ Սակայն որպեսզի մենք խմենք այդ աղբյուրից և հագենանք, որպեսզի մենք ուտենք Երկնքից իջած հացն ու կշտանանք, մենք պետք է սովորենք ճանաչել ու կատարել Տեր Աստծու կամքը, որը գրված է Նրա գրավոր Խոսքի՝ Աստվածաշնչի մեջ։

Աստվածաշունչն ասում է, որ Աստծու կամքը բարի է, հաճելի և կատարյալ (տե՛ս Հռոմեացիս 12․2 խոսքը)։

Հավատա՛, որ դու կանչված ես համաձայն Աստծու կամքի։ Դու բաժին և առաքելություն ունես Նրա հավիտենական ծրագրի մեջ։ Բայց Աստված նաև նպատակ ու ծրագիր ունի քեզ հետ այստեղ՝ այս երկրի վրա, քո երկրային կյանքի համար։ Աստված կամենում է ուղղորդել քեզ, մխիթարել, առաջնորդել և քո կյանքը համահունչ ու ներդաշնակ դարձնել «․․․այն հավիտենական ծրագրին, որ մեր Տեր Հիսուս Քրիստոսի միջոցով իրագործեց։ Նրան հավատալով՝ համարձակություն ունենք վստահաբար Աստծուն մոտենալու» (Եփեսացիս 3․11-12):

Աստծու համար թանկ ու սիրելի՛ զավակ, Տիրոջ կամքն ու ծրագրերը քո կյանքի առումով բարի են, հաճելի ու կատարյալ։ Եթե միա՜յն սկսես ճանաչել այդ կամքը, որը կարող ես գտնել միայն Աստվածաշնչի էջերում և Սուրբ Հոգու հետ հաղորդակցության մեջ․․․ եթե միա՜յն սիրես Նրա կամքը և դառնաս այդ կամքը քո կյանքում ջերմեռանդ ու փափագով կիրառող Նրա աշակերտներից մեկը, ապա Աստված, որպես լավագույն և ամենահմուտ Վարպետ, կսկսի գործել քո կյանքում և կերտել այն գեղեցկագույն կյանքն ու անձնավորությունը, որը Նա նախապես ծրագրել է քո պարագայում։

Դու կանչված ես Նրա կամքով․․․

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։