![March-13 (2) March-13 (2)](https://hisus.am/wp-content/uploads/2024/03/March-13-2-1024x538.jpg)
Աստվածաշունչն ասում է․ «Ոչնչի համար մի՛ մտահոգվեք, այլ ամեն բանում աղոթքով, աղաչանքով և գոհությամբ՝ ձեր խնդրանքները թող հայտնի լինեն Աստծուն։ Եվ Աստծու խաղաղությունը, որ ամեն մտքից վեր է, ձեր սրտերն ու մտքերը Քրիստոս Հիսուսով կպահպանի» (Փիլիպեցիս 4․6-7)։
Իսկ ի՞նչ կարիքի մեջ ես դու, սիրելի՛ բարեկամ:
Ճիշտ ինչպես մեր ընկերների հավատարմությունն է երևում, երբ մենք նեղության կամ կարիքի մեջ ենք, այնպես էլ Տեր Աստծու ողորմածությունն ու սերն են դրսևորվում, երբ մենք դրանց կարիքն ենք ունենում։ Տեր Աստված հավատարիմ, սրտակից Ընկեր է։
Ըստ Աստծու Խոսքի՝ Տերը հոգ է տանում մեր կարիքների համար Իր հարստության համաձայն և Հիսուս Քրիստոսի փառքի միջոցով։
«Եվ իմ Աստվածը թող համաձայն Իր հարստության ձեր կարիքները հոգա Քրիստոս Հիսուսի փառքի միջոցով» (Փիլիպպեցիս 4․19)։
Քո բոլոր կարիքներն, առանց բացառության, հայտնի են Աստծուն։ Եթե ես այժմ քեզ նորից հարցնեմ՝ «Ի՞նչ կարիքի մեջ ես», պատասխանը նույնը կլինի՞։ Գուցե դու մի երկար ցուցակ գրես, որը կներառի ոչ միայն քո հուզական խնդիրները, այլև քո հոգևոր ու ֆիզիկական կարիքները։
Աստծու համար թանկ ու սիրելի՛ զավակ, մինչ դու մտքում կազմում ես այդ ցուցակը, ուզում եմ քեզ հիշեցնել, որ՝
- Տեր Աստված տեսնում է քեզ, Նա գիտի և ճանաչում է քեզ, Նա սիրում է քեզ՝ անկախ բոլոր հանգամանքներից։
- Տեր Աստված բավարարում է քո բոլոր կարիքները համաձայն Իր հարստության։
- Տեր Աստված հոգում է քեզ համար այնպես, որ քո միջոցով փառավորվի Իր Որդին՝ Հիսուս Քրիստոսը։
- Տեր Աստված մեզ ապահովել է ամեն բանով Տեր Հիսուսի միջոցով։
Սակայն Նրան մոտենալու համար կա մի քանի կարևորագույն պայման։ Ահա դրանցից առաջինը, որը, հույս ունեմ, քո կյանքում հաստատուն իրականություն է․ «Բայց առանց հավատի անկարելի է Աստծուն հաճո լինել, որովհետև Աստծուն մոտեցողը պետք է հավատա, որ Նա կա և Իրեն փնտրողներին վարձահատույց է լինում» (Եբրայեցիս 11․6):
Եթե դու հավատում ես Աստծուն, Նրա Խոսքին և Աստվածաշնչի փոխանցած բոլոր ճշմարտություններին, ապա արդեն իսկ հաճելի ես Աստծուն և կարող ես, որպես Նրա զավակ, համարձակությամբ մոտենալ Նրա շնորհի աթոռին և օգնություն խնդրել քո կյանքի իրավիճակների համար։
«Արդ ունենք երկինքներով անցած մեծ Քահանայապետ՝ Հիսուսին՝ Աստծու Որդուն, ուստի ամուր պահենք դավանությունը։ Որովհետև ոչ թե մի քահանայապետ ունենք, որ չի կարող մեր տկարություններին չարչարակից լինել, այլ մի այնպիսին, որ ամեն բանով փորձված է մեզ նման, բայց առանց մեղքի է։ Ուրեմն Նրա շնորհի աթոռին համարձակությամբ մոտենանք, որպեսզի ողորմություն ստանանք ու շնորհ գտնենք մեզ օգնության պատեհ ժամին» (Եբրայեցիս 4․14-16):
Ես քեզ հրավիրում եմ այսօր համարձակությամբ մոտենալու Տեր Աստծու շնորհքի գահին, որպեսզի ողորմություն և շնորհք գտնես քո նեղությունների ու կարիքի մեջ։
Հիշի՛ր, որ դու Աստծո հրաշքն ես, և Աստված սիրում է քեզ։
Շնորհակալ եմ, որ դու կա՛ս։
Դու Աստծո հրաշքն ես:
![156380229_268237911526745_6094722723839198753_n 156380229_268237911526745_6094722723839198753_n](https://hisus.am/wp-content/uploads/2021/03/156380229_268237911526745_6094722723839198753_n.png)
Աստված ուզում է փոխել քո կյանքը
Ստացիր ամենօրյա քաջալերանքներ
Ուզում ես ստանալ ամենօրյա քաջալերանքները քո էլ․ փոստի՞ն։ Բաժանորդագրվիր «Քո հրաշքն՝ ամեն օր» նամակագրությանը