November-29

Գլխավոր | Հրաշքներ | Երբ ընտանիքդ կործանման շեմին է․․․

Երբ ընտանիքդ կործանման շեմին է․․․

Սիրելի՛ բարեկամ, ես չգիտեմ մի ընտանիք, որը չի անցել ճգնաժամային իրավիճակներով։ Նման ժամանակներում ընտանիքի որոշ անդամներ իրար հետ վիճաբանություններ են ունենում, չեն հասկանում իրար, և ընտանիքում տիրում է լարված ու շիկացած մթնոլորտը։ Իսկ հավատքի մարդկանց ընտանիքներում նման իրավիճակները լրջագույն ազդեցություն են թողնում ընտանիքի անդամների աղոթքի կյանքի և Տեր Աստծու հետ ունեցած հարաբերության վրա։ 

Օրինակ, ամուսինների պարագայում Աստծո Խոսքն այս զգուշացումն է մեզ փոխանցում․ «Նույնպես և դուք, ամուսիննե՛ր, նրանց հետ խոհեմությա՛մբ ապրեք, կնոջը որպես դյուրաբեկ անոթի՛ վերաբերվեք, պատվե՛ք իբրև կյանքի շնորհի ժառանգակիցների, որպեսզի ձեր աղոթքներին արգելք չլինի» (Ա Պետրոս 3.7):
Այս սկզբունքը տարածվում է ընտանիքի բոլոր անդամների վրա։ Եթե կինը ամուսնու հանդեպ չունի այն վերաբերմունքը, որն Աստված է կամենում, որ նա ունենա, դա նույնպես արգելք է նրա աղոթքներին։ Նույնը ճշմարիտ է ծնողի կողմից իր զավակի հանդեպ վերաբերմունքի պարագայում, երեխայի կողմից ծնողի հանդեպ ունեցած վերաբերմունքի կամ քույրերի ու եղբայրների հարաբերությունների դեպքում։ Աստծո կամքին հակառակ ցանկացած վերաբերմունք արգելք է մեր աղոթքներին և խոչընդոտ՝ Տեր Աստծու հետ ունեցած մեր հարաբերությանը։

Երբ ընտանիքդ անցնում է հարաբերությունների այսպիսի ճգնաժամային իրավիճակով, դու ասես հայտնված լինես մի մութ լաբիրինթոսի մեջ, որից դուրս գալու բոլոր ջանքերը քեզ ավելի խորն են տանում հարաբերությունների ճգնաժամի մեջ և ավելի լարում առանց այդ էլ լարված հարաբերություններդ։ 

Նման դեպքերում ստեղծված իրավիճակից լավագույն ելքը մեզ կարող է ցույց տալ Աստվածաշունչը։ Այն մեզ վստահեցնում է, որ «Աստված ապավեն և զորություն է մեզ համար. Նա արագահաս օգնական է եղել նեղությունների մեջ» (Սաղմոս‬ ‭46‬.‭1): 

Երբ ընտանիքդ անցնում է ճգնաժամային իրավիճակով, և դու ոչ մի ելք չես տեսնում ստեղծված իրավիճակից, ապա խելամիտ կլինի օգնություն խնդրել այն Մեկից, Ով տեսնում է ամեն բան և գիտի ցանկացած խավար ու մութ լաբիրինթոսից դուրս գալու ելքը։ Ահա, թե ինչ հրաշալի խորհուրդ է մեզ փոխանցում Աստվածաշունչը․ «Ոչնչի համար մի՛ մտահոգվեք, այլ ամեն բանում աղոթքով, աղաչանքով և գոհությամբ՝ ձեր խնդրանքները թող հայտնի լինեն Աստծուն։ Եվ Աստծու խաղաղությունը, որ ամեն մտքից վեր է, ձեր սրտերն ու մտքերը Քրիստոս Հիսուսով կպահպանի» (Փիլիպպեցիս 4․6-7):

Աստված մեզ իմաստություն է տալիս, խրատում է մեզ, հանդիմանում, մխիթարում, քաջալերում, սովորեցնում համբերել, ներել, Իր զորությամբ հաղթահարել ծանրագույն իրավիճակները և այլն։ Աստված արագահաս օգնական է, եթե միայն մենք անգամ ամենավատ իրավիճակներում ձգտում ենք մարդկանց վերաբերմունքին արձագանքել այնպես, ինչպես Աստված է կամենում, որ արձագանքենք, և ձգտում ենք այնպես վերաբերվել մեզ ցավեցնողներին, ինչպես Աստված է կամենում, որ վերաբերվենք։ Այսպիսով, ամենակարևոր բանը ամենախորը ճգնաժամի մեջ Աստծու հետ մեր հարաբերությունը առողջ վիճակում պահելն է։ Այդ դեպքում ոչ մի արգելք չի լինի մեր աղոթքներին, և մենք կկարողանանք Տիրոջից աղոթքով օգնություն ընդունել։ 

Աստծու համար թանկ ու սիրելի՛ զավակ, եթե այսօր քո ընտանիքը հենց նմանատիպ դժվարության և ճգնաժամային իրավիճակի մեջ է հայտնվել, ապա առաջարկում եմ քեզ աղոթել միասին այս աղոթքով․ «Տե՛ր, ես փառաբանում ու երկրպագում եմ քեզ։ Դու իմ սրտի Թագավորն ես։ Դու տեղյակ ես իմ ընտանիքում տիրող մթնոլորտից և հարաբերությունների ճգնաժամից։ Եվ Դու ինձ ավելի լավ ես ճանաչում, քան որևէ մեկն այս աշխարհում… Դու գիտես, թե որքա՜ն խորը ցավ է դա ինձ պատճառում։ Տե՛ր, լսիր այսօր Քեզ ուղղված իմ սրտի աղաղակը։ Իմ բարի ու ողորմած Աստվա՛ծ, Քո սուրբ և պատվական Խոսքի համեմատ այսօր ես աղոթքով, աղաչանքով ու գոհությամբ Քո առջև եմ բերում իմ խնդրանքը։ Տե՛ր, ողորմություն և շնորհ արա իմ ընտանիքին և իմ սիրելիներին։ Աղոթում եմ, որ իմ ընտանիքում, իմ տան մեջ կրկին խաղաղություն տիրի և ներողամտությունն ու սերը փոխարինեն լարվածությանն ու վիրավորանքներին։ Աղոթում և խնդրում եմ Տեր Հիսուսի զորավոր անունով։ Ամե՛ն»։ 

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։

Դու Աստծո հրաշքն ես:

156380229_268237911526745_6094722723839198753_n

Աստված ուզում է փոխել քո կյանքը

Ստացիր ամենօրյա քաջալերանքներ

Ուզում ես ստանալ ամենօրյա քաջալերանքները քո էլ․ փոստի՞ն։ Բաժանորդագրվիր «Քո հրաշքն՝ ամեն օր» նամակագրությանը



*Բաժանորդագրվելով Դուք համաձայնում եք Hisus.am -ի պայմաններին ու անվտանգության կանոններին: