Հնազանդություն

Այսօր ավարտում ենք «Դարձի՛ր Երկնքի Արքայության դեսպանը» անվանումը կրող շարքը։ Առաջարկում եմ միասին խորհել աստվածաշնչյան մի կարևորագույն որակի մասին, որը մեզ կօգնի պատրաստվել Երկնքի Արքայության դեսպանը դառնալուն։ Այդ կարևորագույն որակը հնազանդությունն է։ Երբ մենք Աստծու կամքին հնազանդությունը դարձնենք մեր կյանքում գործնական կիրառություն ունեցող որակ, ապա ոչ միայն զորեղ հոգևոր աճ կգրանցենք հավատքի կյանքում, այլև կհաստատվենք ու կհմտանանք Աստծու Արքայության դեսպանը լինելու մեր առաքելության մեջ։ 

Սիրելի՛ բարեկամ, Աստված կամենում է, որ դու դառնաս Նրա օգնության ձեռքը քո շրջապատի կոտրված սիրտ ունեցող մարդկանց համար։ Լինել Աստծու Արքայության դեսպանն այս երկրի վրա նշանակում է պատրաստ լինել գործելու, երբ Տերը հրահանգի գործել կամ խոսել։ 

Ահա՛ թե ինչպիսի խոստում ունի Աստված մեզ համար․ «Հիմա եթե իսկապես լսեք Իմ ձայնը և պահեք Իմ ուխտը, այն ժամանակ դուք Ինձ համար կլինեք սեփական ժողովուրդ բոլոր ազգերից, որովհետև Իմն է ամբողջ երկիրը» (Ելից 19․5)։

Ի տարբերություն Աստծու սիրո, որ բոլորին տրված է նույն չափով, Աստծու բարեհաճությունը հավասարաչափ չի տրվում ամենքին։ Բարեհաճությունն Աստծու շնորհն է, որը մեզ կարողություն է տալիս, որպեսզի իրականացնենք այն, ինչի համար կանչված ենք։ Եվ հե՛նց հնազանդությունն է Տեր Աստծու բարեհաճությանն արժանանալու բանալին, քանի որ Արքայության դեսպանների առաքելությունը կազմող մեծ գործերը վստահվում են նրանց, ովքեր հնազանդություն են դրսևորել փոքր անելիքների մեջ։   

Երբ զգում ես, որ սիրտդ տկարացել է, և պատրաստ չես հնազանդ լինելու համար զոհաբերել այն, ինչը համարում ես քեզ համար չափազանց թանկ, հիշի՛ր, որ Տերն Իր զորությամբ քեզ կօգնի կայացնել ճիշտ որոշումներ և Իրեն հնազանդվելը վեր դասել քո անձնական կապվածություններից։ Աստված բարկացած Հայր չէ, Ով Իր զավակից պահանջում է հնազանդվել անկախ ամեն ինչից։ Երբ Աստված մի բան է մեզնից պահանջում, Նա նաև զորացնում է մեզ, որպեսզի կարողանանք հնազանդվել Իր պահանջներին։ Նա բարի Հայր է։ 

Աստծու համար թանկ ու սիրելի՛ զավակ, քաջալերում եմ քեզ, որպեսզի միշտ վստահես Տեր Աստծուն։ Երբ խնդիրներ են ծագում քո կյանքում, դու պետք է ընտրես Աստծուն հետևելու և Նրա խոսքին հնազանդվելու ճանապարհը։ Տերը կզորացնի քեզ և կընդլայնի քո հնարավորությունների սահմանները, և այն, ինչ չես կարողանում անել սեփական ուժի շնորհիվ, կկարողանաս Աստծու գերբնական միջամտության արդյունքում։ Դարձի՛ր Աստծու Արքայության հավատարիմ դեսպանը։ Դարձի՛ր Աստծու՝ օգնության մեկնած ձեռքը քո շրջապատի մարդկանց համար, և քո միջոցով շատերը կօրհնվեն ու կընդունեն Տիրոջից իրենց համար այնքա՜ն անհրաժեշտ շնորհքն ու ողորմությունը։

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։